Það dregur úr öskufalli

Dregið hefur úr öskufalli úr eldstöðinni í Eyjafallajökli segir Halldór Björnsson veðurfræðingur. Það þýði þó ekki að gosið sé endilega í rénun. Það sé hins vegar að breytast úr öskugosi í hraungos. Um 750 tonn af ösku á sekúndu hafa komið úr gígnum. Gosið sé því ekki lítið. Það teljist til meðalgosa.

Gosmökkurinn yfir eldstöðvunum í Eyjafjallajökli hefur greinilega minnkað en öskufall er undir Eyjafjöllum. Að sögn Ómars Ragnarssonar, sem flaug yfir eldstöðvarnar í ljósaskiptunum kl. fimm í morgun, hefur gosið greinilega minnkað. Mökkurinn nær í 15 til 16.000 feta hæð. Miklar öskusprengingar eru í gígnum sem mynda 500 metra háa stróka og um kílómetra breiða. Eldur er ekki mikill í gígnum. Í morgun var öskufall undir vestanverðum Eyjafjöllum. Norðaustanátt og sandfok var á Markarfljótseyrum.

Veðurstofan gerir ráð fyrir öskufalli allt umhverfis Eyjafjallajökul í dag í hægri norðanátt. Síðdegis fer að rigna eftir að hann  snýst í sunnanátt. Í kvöld verður vestanátt og færist þá öskufall til austurs. Norðanátt á morgun og öskufall til suðurs.

Stjórnstöð almannavarna segir að kleprar úr sprengingum í gígnum hafi náð um 1,5 - 3 km hæð í morgun. Sunnar náðu öskuskýin í um 5-6 km hæð. Ekki sé hægt að merkja hraunrennsli frá gosinu, hvorki til norðurs né suðurs. Ekki er hætta á hlaupi, vegna sírennslis vatns niður jökulinn.

Lögreglumenn á tveimur bílum vöktuðu svæðið undir Eyjafjöllum í nótt. Klukkan hálf sjö var 500 metra skyggni við Ásólfsskála.(ruv.)

Björgvin Guðmundsson