Alþingi bæti kjör aldraðra og öryrkja!

 

Um þetta leyti í fyrra skoraði ég á alþingi að bæta kjör aldraðra og öryrkja það mikið, að þau dygðu til sómasamlegrar framfærslu.Ég gerði þetta í grein í Fréttablaðinu. Ég benti á, að  þeir aldraðir og öryrkjar, sem aðeins hefðu lífeyri almannatryggnga  hefðu ekki fyrir öllum útgjöldum og gætu ekki leyst út lyfin sín eða yrðu að sleppa því að fara til læknis þó nauðsynlegt væri. Ég skoraði á alþingi að leysa málið strax. Ég var svo grænn, að ég hélt að alþingi mundi taka rögg á sig,  gera þverpólitíska sátt og afgreiða kjarabætur til aldraðra og öryrkja í allsherjar sátt.. Með því hefði álit á alþingi stóraukist. Á því hefði ekki verið vanþörf á.

 

EKKERT GERÐIST

 

Ekkert gerðist. Alþingi gerði ekki neitt.Alþingi hafði engan áhuga á að leysa vanda aldraðra og öryrkja.Alþingi hefur greinilega fundist þægilegra, að aðhafast ekkert .Það hefði verið talsverð vinna að koma á þverpólitískri sátt .Ég skrifaði líka forseta alþingis,Einari K. Guðfinnssyni; bað um að hann hefði forgöngu fyrir því, að alþingi samþykkti kjarabætur fyrir aldraða og öryrkja.Forseti alþingis brást líka. Hann stakk bréfinu undir stól.Hann hafði sama hátt á og ráðherrarnir, þegar þeir fá bréf frá öldruðum og öryrkjum. Þeir stinga bréfunum ofan í skúffu.

ALÞNGI BRÁST Í FYRRA

Alþingi brást öldruðum og öryrkjum  í fyrra.Til þess að kóróna ósómann felldi alþingi við afgreiðslu fjárlaga að veita öldruðum og öryrkjum afturvirkar kjarabætur eins og öðrum í þjóðfélaginu. Davíð Oddsyni fyrrverandi forsætisráðherra og formanni Sjálfstæðisflokksins ofbauð þetta. Hann gagnrýndi það í  í sjónvarpinu við umræður um forsetaembættið, að aldraðir og öryrkjar skyldu ekki fá afturvirkar kjarabætur í fyrra eins og aðrir.

 

NÝ ÁSKORUN Á ALÞINGI

 

Ástandið er enn þannig í kjaramálum þeirra aldraðra og öryrkja,sem eingöngu verða að reiða sig á lífeyri frá almannatryggingum, að þeir eiga ekki fyrir öllum útgjöldum.Þeir hafa ekki nóg til framfærslu. Ég vil því enn á ný skora á alþingi að leysa mál þessa fólks. Ég skora á alþingi að hækka lífeyri þessa hóps þannig, að dugi til framfærslu.Ég tel, að hækka þurfi lífeyrinn um 50 þúsund krónur á mánuði að lágmarki til þess að lífeyrir dugi til sómasamlegrar framfærslu. Hækka á verst stadda hópinn um þessa fjárhæð og aðrir aldraðir og öryrkjar hækki hlutfallslega. Ég skora á alþingi að gera þverpólitíska sátt til þess að leysa framfærsluvanda aldraðra og öryrkja.

 

Björgvin Guðmundsson

 

Birt í Fréttablaðinu 28.júlí 2016

 

 

Hvaða flokkar standa með öldruðum og öryrkjum?

Hvaða flokkar standa með kjarabótum til handa öldruðum og örykjum í næstu kosningum? Það er spurningin,sem aldraðir og öryrkjar þurfa að svara fyrir næstu þingkosningar.Einnig má spyrja: Hvaða frambjóðendur vilja styðja bætt kjör aldraðra og öryrkja.Aldraðir og öryrkjar eiga ekki að kjósa aðra frambjóðendur eða flokka en þá sem vilja bæta kjör þeirra. Og best er að láta reyna á þetta strax og þing kemur saman í ágúst.Reynslan af loforðum er ekki góð,a.m.k. ekki af loforðum,sem núverandi stjórnarflokkar gáfu öldruðum og öryrkjum fyrir þingkosningarnar 2013.Þau loforð voru flestöll svikin og hafa ekki verið efnd enn í dag.

Ekki er unnt að trúa neinum nýjum loforðum Sjálfstæðisflokksins og Framsóknarflokksins um bætt kjör aldraðra og öryrkja.Þessir flokkar verða að láta verkin tala í kjaramálum aldraðra og öryrkja á þeim stutta tíma,sem eftir er af þinginu. Að mínu mati verða þessir flokkar að efna öll kosningaloforðin við aldraða og öryrkja frá síðustu kosningum áður en  til greina kemur að hlusa á ný loforð frá þessum flokkum.En auk þess hefur Bjarni Benediktsson formaður Sjálfstæðisflokksins lýst því yfir,að lífeyrir aldraðra og öryrkja megi ekki vera hærri en lágmarkslaun verkafólks.Í dag er lífeyrir sá sami og lágmarkskaunin. Bjarni vill halda lífeyri þar,þ,e. halda honum niðri við fátækramörk.Þannig hefur Bjarni tekið afstöðu gegn þeim öldruðum og öryrkjum sem verst eru staddir.Bjarni og Sjálfstæðisflokkurinn hefur því komið sér út úr húsi hjá öldruðum og 0ryrkjum.

Nú eru aðrir flokkar að undirbúa stefnu sína fyrir væntanlegar þingkosningar. Aldraðir og öryrkjar þurfa að kynna sér hana,fá að fylgjast með til þess að þeir geti ákveðið hvern og hverja á að styðja. Best er,að flokkarnir flytji tilllögur um kjarabætur til aldraðra og öryrkja strax á þinginu í næsta mánuði. Þetta tekur ekki langan tíma.Og falleg loforð eru varasöm.Best er að fá efndir strax fyrir kosningar.

 

Björgvin Guðmundsson