Misskilningur um frv um almannatryggingar!

Margir virðast telja,að hagur þeirra aldraðra og öryrkja,sem verst eru staddir,muni batna,ef frv um almannatryggingar verði samþykkt.En þetta er misskilningur. Stjórnmálamenn og sérstaklega fulltrúar ríkisstjórnarinnar eru búnir að klifa á því í langan tíma,1-2 ár,að hagur þeirra verst stöddu muni batna.En þetta er ekki rétt.Þetta er blekking. Þessi áróður hefur smogið alls staðar inn,þannig að ólíklegustu menn eru farnir að trúa þessu.Hverjir eru verst staddir meðal lífeyrisþega? Það eru þeir,sem hafa einungis lífeyri frá almannatryggingum og ekki aðrar tekjur; eru á strípuðum lífeyri eins og sagt er. Er verið að bæta hag þeirra? Nei ekki um eina krónu.Það var staðfest á alþingi í gærkveldi.Eygló ráðherra sagði,að hagur þeirra yrði bættur í framtíðinni! Það er mikil huggun í því,eða hvað? En hverra hagur batnar þá? Jú hagur þeirra,sem hafa lífeyrissjóð batnar nokkuð.En þó er grunnlífeyrir felldur niður þó eldri borgarar hafi alltaf lagt áherslu á,að halda honum.En lífeyrir TR skerðist meira en áður vegna atvinnutekna.Hagur þeirra versnar sem sagt.-Ég tel,að afnema eigi skerðingar vegna lífeyrissjóða alveg.Við eigum þennan lífeyri og ríkið á ekkert með að skerða hann hvorki beint né óbeint.Mál er,að linni.

Björgvin Guðmundsson

Stjórnvöld hér neikvæð í garð aldraðra og öryrkja!

 

Margir undrast það hve  neikvæð stjórnvöld hér  eru gagnvart eldri borgurum. Þessu er á annan veg farið í grannlöndum okkar. Þar eru stjórnvöld jákvæð í garð aldraðra og leitast við að fylgjast með því  á hvern hátt þau geti létt undir með lífsbaáttu þeirra. Hér standa stjórnvöld gegn kjarabótum aldraðra eins lengi og þau telja það nokkurn kost. Það má eiginlega segja, að neyða verði stjórnvöld hér til þess að veita öldruðum sjálfsagðar og eðlilegr kjarabætur í takt við launahækkanir launþega. Grunnlífeyrir er þrefalt hærri í grannlöndum okkar en hér. Og heildarlífeyrir er miklu hærri í  nágrannalöndum okkar.Þá þekkjast þar ekki þessar miklu tekjutengingar, sem hér eru.

 

Fyrir alþingiskosningarnar 2013  fór ég sem formaður kjaranefndar Félags eldri borgara í Reykjavík  á fund  formanna allra þingflokka stjórnmálaflokkanna  og ræddi við þá um kjaramál aldraðra. Með  mér í för voru 2-3 fulltrúar kjaranefndar. Fundir þessir gengu nokkuð vel. Stjórnarandstöðuflokkarnir á þingi voru áberandi jákvæðari  gagnvart erindi okkar um kjarabætur. Leiddu viðræður okkar við þá til þess, að Sjálfstæðisflokkurinn og Framsóknarflokkurinn  tóku upp í stefnuskrár sínar  2013 ýmsar óskir kjaranefndar um kjarabætur aldraðra. Hreyfingin tók erindi okkar svo vel, að  Margrét Tryggvadóttir þingmaður flokkksins flutti þingmál  í samræmi við okkar óskir.Það náði þó ekki fram að ganga.

 

En björninn var ekki unninn þó Sjálfstæðisflokkurinn og Framsókn tækju mikilvæg  kjaramál eldri borgara upp í stefnuskrár sínar. Við í kjaranefndinni fögnuðum þessu en gleði okkar stóð ekki lengi. Umræddir flokkar  stóðu ekki við fyrirheit þau, sem þeir gáfu öldruðum og öryrkjum í  stefnuskrám sínum. Þeir hafa ekkert  gert  í því að efna mikilvægasta fyrirheitið, þ.e. að leiðrétta lífeyri vegna kjaragliðnunar krepputímans. Hitt  fyrirheitið var að afturkalla kjaraskerðingu aldraðra og öryrkja  frá árinu 2009. Þar var um 6 atrði að ræða. Aðeins 3 þeirra hafa verið afturkölluð og í rauninni aðeins 2, þar eð eitt rann úr gildi af sjálfu sér.Það var tímabundið.

 

Það er verkefni sálfræðinga að rannsaka hvers vegna  stjórnmálamenn og ráðamenn  hér hafa neikvæða afstöðu til eldri borgara . Það getur hver maður séð, að  kjör þeirra lífeyrisþega,sem hafa einungis tekjur frá almannatryggingum, eru óásættanleg. Það væri einnig eðlilegt og röklegt að stjórnvöld og stjórnmálamenn væru jákvæðir í garð eldri borgara vegna þess hve mikið eldri kynslóðin hefur gert til þess að skapa það þjóðfélag,sem við búum í.Vonandi verður breyting á.

 

Björgvin Guðmundsson

pistlahöfundur

Fréttablaðið 8.sept.2016