Á að takmarka aðstreymi útlendinga til landsins

 Skiptar skoðanir eru um aukið aðstreymi útlendinga til Íslands. Sumir telja, að  aðstreymið hafi verið of mikið og að sporna verði við  miklum innflutningi útlendinga til landsins .Uppsveiflan í íslensku efnahagslífi hefur kallað á aukið vinnuafl og ekki hefur reynst kleift að mæta þeirri auknu eftirspurn með innlendu vinnuafli. Þess vegna hefur orðið að flytja inn erlent vinnuafl  í miklum mæli. Samtímis hefur það aukist ,að Íslendingar fáist ekki í ýmis konar þjónustustörf og því eru útlendingar í æ ríkari mæli ráðnir í þau. Um langt skeið hefur verið erfitt að manna frystihúsin með Íslendingum og því er það nú algengt,  að Pólverjar og aðrir útlendingar haldi fiskvinnslunni uppi í frystihúsum. Margir hafa áhyggjur af þessari þróun. Og ýmsir öfgamenn vilja banna innflutning á erlendu vinnuafli.Þeir, sem ganga lengst í öfgunum, vilja senda útlendinga aftur úr landi.

 EES er einn vinnumarkaður 

Hvað er til ráða í þessu efni? Ísland er aðili að Evrópska efnahagssvæðinu (EES) og þar er einn vinnumarkaður með frjálsu flæði vinnuafls. Það þýðir, að fólk  á EES svæðinu getur komið til Íslands til þess að vinna án þess að framvísa atvinnuleyfi.Fólk frá Austur-Evrópu-ríkum, sem eru í EES,  þarf því ekki atvinnuleyfi til þess að fá vinnu á Íslandi. Það getur því komið til Íslands án þess  tryggja sér atvinnu fyrst .Er þá ekkert unnt að gera til þess að draga úr straumi erlends vinnuafls frá EES svæðinu?. Jú það er ýmis legt unnt að gera. Það má t.d. setja ýmis skilyrði svo sem að fólk, sem ráðið er til þjónustustarfa,  verði að kunna íslensku. Það er eðlilegt krafa, þar eð fólk sem vinnur t.d. á sjúkrahúsum og dvalarheimilum aldraðra verður að geta talað við sjúklinga og vistmenn á íslensku .Sama gildir raunar um afgreiðslustörf og ýmis önnur þjónustustörf.  Í dag eru útlendingar að vinna  á elliheimilum án þess að tala íslensku og án þess að geta talað við sjúklingana. Það gengur ekki. Ef skilyrði væru sett um íslensku kunnáttu mundi það draga úr straumi erlends vinnuafls hingað og það mundi leiða til þess að menn yrðu að læra íslnesku áður en þeir hæfu störf eða að öðrum kosti að  hætta við að vinna hér á landi. Fólk utan EES svæðisins þarf atvinnuleyfi hér á landi og  unnt er  að neita því um atvinnuleyfi  hér,  ef við teljum orðið of mikið af erlendu vinnuafli í landinu.  

Fordómar gagnvart útlendingum  

Nokkuð ber á fordómum hér gagnvart útlendingum.Einkum virðast menn hræddir við Múslima og fólk frá Arabalöndunum.Að vísu er mjög fátt hér um slíkt fólk.En margir virðast telja, að flestir Arabar séu hryðjuverkamenn. Það er auðvitað fráleitt.Og margir vilja kenna útlendingum um allt sem aflaga fer hér í næturlífi. Ef útlendingar eru viðriðnir  obeldi á almannafæri eru fjölmiðlar mun dómharðari í þeirra garð en ef Íslendingar eiga í hlut.Auðvitað eru útlendingar, sem setst hafa hér að misjafnir eins og Íslendingar.Það gengur ekki að dæma alla útlendinga, sem hér búa,  eftir nokkrum svörtum sauðum.Margir útlendinganna eru ágætis fólk. Það er t.d. látið mjög vel af Pólverjum sem vinnukrafti í frystihúsum landsins og  yfirleitt eru þeir ekki til neinna vandræða. 

Erlent vinnuafl mikilvægt  

Við verðum að átta okkur á því, að eins og staðan er í íslensku atvinnulífi í dag er ekki unnt að reka það án erlends vinnuafls. Það yrði  erfitt að reka spítalana og ýmsar aðrar þjónustustofnanir, ef erlends vinnuafls nyti ekki við. Og frystihúsin mundi sennilega stöðvast,  ef Pólverjarnir færu. Hins vegar þarf að leggja mikla áherslu á, að  útlendingarnir aðlagist íslensku þjóðfélagi. Mikilvægast er í því sambandi, að þeir læri íslensku .Í því  efni hefur til þessa verið mikill slappleiki. Það verður að herða á í  þvi efni. Algert skilyrði er, að allir, sem vinna þjónustustörf tali íslensku. 

Björgvin Guðmundsson

Skattar á öldruðum hækkaðir

Skattbyrði aldraðra hefur stóraukist í valdatíð núverandi stjórnarflokka. Ef litið er á skatta 66-70 ára kemur í ljós,að á tímabilinu 1994-2004  hafa skattar þeirra aukist úr 18,2% af tekjum í 27,3% eða alls um 9,1 prósentustig.Skattar 71-75 ára hafa á sama tímabili aukist úr 11,1% í 24,2% eða um 13,1 prósentustig og  skattar 76 ára og eldri hafa aukist á sama tímabili úr 7,6% í 21,4% eða um 13,8 prósentustig. Á sama tíma hafa skattar meðalfjölskyldunnar hækkað úr 19,2% í 23,7% eða um 4,5 prósentustig. Eða m.ö.o.: Því eldra sem fólk er og því lægri sem tekjurnar eru þeim mun meiri er aukning skattbyrðarinnar.

 Skattar hálaunafólks lækkaðir 

Á sama tíma og þetta hefur gerst hafa skattar hálaunafólks og fyrirtækja verið lækkaðir. Hátekjuskattur var felldur niður. Stefna ríkisstjórnarinnar hefur komið vel fram í skattamálunum og  í framkomunni gagnvart öldruðum. Það er ekki aðeins,að lífeyri aldraðra hafi verið haldið niðri svo þeir fá aðeins hungurlús frá almannatryggingum heldur hefur á sama tíma verið  níðst á þeim með því að hækka á þeim skatta.

 

Björgvin Guðmundsson

 

Framkvæmdasjóður aldraðra misnotaður

  

Það mun hafa verið Albert heitinn Guðmundsson, sem fyrstur hreyfði þeirri hugmynd í borgarstjórn Reykjavíkur að leggja ákveðinn skatt á hvern gjaldanda í landinu til þess að  kosta byggingu hjúkrunarheimila fyrir aldraða. Við sem þá sátum með Albert í borgarstjórn urðum strax hrifnir af þessari hugmynd hans og það skapaðist þverpólitísk samstaða um hana. Hugmyndin náði fram að ganga og það var lögfest að  leggja á landsmenn gjald,sem mynda skyldi framkvæmdasjóð  aldraðra til þess að kosta framkvæmdir við byggingu stofnana fyrir eldri borgara. En misvitrir stjórnmálamenn hafa eyðilagt framkvæmdasjóðinn. Það var opnuð heimild til þess að sjóðurinn kostaði einnig í vissum tilvikum rekstur hjúkrunarheimila og stofnana og eins og ég hefi bent á áður  í greinum mínum hafa margir milljarðar verið teknir úr sjóðnum til reksturs. Það var aldrei meiningin, þegar sjóðurinn var stofnaður, að láta neitt renna úr honum til reksturs.Alls munu hafa verið teknir 3-4 milljarðar úr framkvæmdasjóðnum til eyðslu, til  reksturs á undanförnum árum. Það er forkastanlegt, þar eð þetta hefur gerst á sama tíma og mikil vöntun hefur verið á hjúkrunarheimilum fyrir aldraða og biðlistar hafa verið mjög langir. Það eru ráðherrar heilbrigðis og tryggingamála,sem bera ábyrgð á þessu ráðslagi.

 

Framkvæmdasjóður látinn styrkja söng og listir!

 

En ráðherrar hafa ekki látið við það sitja að taka fjármagn úr framkvæmdasjóði til reksturs. Nei þeir hafa einnig látið sjóðinn styrkja ýmis gæluverkefni  á sviði menningar-og listastarfsemi og meira að segja hefur núverandi heilbrigðisráðherra látið sjóðinn kosta útgáfu  áróðursbæklings..Mig rak í rogastans, þegar ég heyrði Ástu Ragnheiði Jóhannesdóttur, alþingismann, segja frá því á Útvarpi Sögu, að framkvæmdasjóður aldraðra hefði styrkt ýmis  verkefni á sviði söng-og listastarfsemi.Þessar styrkveitingar eru að mínu mati ólöglegar eða a.m.k. stríða gegn anda laganna..Sjóðurinn er kominn langt út fyrir sitt markmið með því að veita peningum í slík verkefni.Í rauninni er hér um misnotkun á sjóðnum að ræða.

 

Milljörðunum verði skilað til  aldraðra

 

Eldri borgarar krefjast þess, að ríkið skili aftur þeim milljörðum, sem teknir hafa verið úr framkvæmdasjóði til eyðslu.Aldraðir vilja fá þessa peninga til byggingar hjúkrunarheimila.Eldri borgarar vilja einnig fá til baka þá fjármuni,sem stjórnarflokkarnir hafa haft af öldruðum í skertum lífeyri  síðustu 12 árin.Þar er um 40 milljarða að ræða. Stjórnvöld lofuðu því 1995, að aldraðir mundu fá sömu uppbætur á lífeyri  sinn eins og láglaunafólk fengi á laun sín. Þetta fyrirheit var svikið. Þau svik hafa kostað aldraða 40 milljarða.Ríkið verður að leiðrétta kjör aldraðra með því að greiða þeim þessa fjárhæð til baka strax.

 

Björgvin Guðmundsson

  

Geir vill Framsókn í stjórn áfram

Morgunblaðið birti stórt viðtal við Geir Haarde,forsætisráðherra, á sunnudag.Þar er Geir m.a. spurður um hvaða samstarfsaðila í ríkisstjórn Sjálfstæðisflokkurinn vilji helst.Geir svarar: Framsókn. Svar Geirs kemur ekki á óvart, þar eð Framsókn hefur verið þæg í taumi allan þann tíma,sem hún hefur verið í stjórn með íhaldinu.Framsóknarflokkurinn hefur verið sannkölluð hækja í stjórnarsamstarfinu. Og nú er svo komið, að Framsókn er  að þurrkast út hvað fylgi varðar.Kjósendur eru að refsa Framsókn fyrir langa íhaldsþjónkun.

 Aldraðir og öryrkjar “gleymdust” 

Geir Haarde segir í viðtalinu við Mbl., að hann vilji halda áfram að bæta lífskjör Íslendinga. En hvernig hefur það starf til tekist fram til þessa? Það hefur tekist þannig, að kjör og aðstaða atvinnurekenda og fjármagnseigenda hefur verið stórbætt. Tekjurskattur fyrirtækja hefur verið lækkaður í 18% á sama tíma og skattur launþega er 35%. Fjármagnseigendur greiða aðeins 10% skatt og greiða ekkert meira til samfélagsins. Stjórnarflokkarnir hafa “ gleymt” öldruðum og öryrkjum,þegar þeir hafa verið að bæta kjör annarra í þjóðfélaginu. Aldraðir og öryrkjar hafa setið eftir. Loforð,sem gefið var 1995 um að þessir hópar fengju sömu hækkun á lífeyri sinn og launafólk,var svikið. Öryrkjar þurftu að leita til Hæstaréttar til þess að fá lögbundnar lífeyrisgreiðslur.Það er sama hvar borið er niður: Stjórnarflokkarnir hafa níðst á láglaunahópum þjóðfélagsins og þeim,sem minna mega sín.Þessir flokkar þurfa að fá frí í kosningunum 12.mai.

 

Björgvin Guðmundsson

Tekur nýi flokkurinn fylgi frá íhaldinu?

Nýr stjórnmálaflokkur  hefur verið stofnaður,Íslandshreyfingin, undir forustu Ómars Ragnarssonar og Margrétar Sverrisdóttur. Ómar er formaður og Margrét varaformaður. Stofnun þessa flokks hefur verið lengi í undirbúningi eða allt frá  því, að Margrét tapaði varaformannsslagnum í Frjálslynda flokknum en í kjölfar þess  sagði hún sig úr Frjálslynda flokknum. Ómar hefur verið talinn sjálfstæðismaður. Er ljóst, að þessi nýi flokkur ætlar að reyna að sækja fylgi frá Sjálfstæðisflokknum og Frjálslynda flokknum. Það er tvennt sem nýi flokkurinn leggur áherslu á: Umhverfismál og markaðsbúskap. Sumir kalla nýja flokkinn hægri grænan. Og ef til vill er það réttnefni,þar eð flokkurinn er hægri sinnaður umhverfisflokkur.Talsmenn nýja flokksins leggja áherslu  á, að flokkurinn sé ekki sósialistaflokkur eins og Vinstri grænir. Þeim er mikið í mun að koma því til skila, að flokkurinn  berjist fyrir hægri gildum. Það er því ljóst,að flokkurinn ætlar að sækja fylgi frá hægri.  Spurningin er sú hvernig þessum nýja flokki mun vegna.Reynslan sýnir,að nýir flokkar eiga erfitt uppdráttar. Ég spái því,að þessi nýi  flokkur fái 2-3 þingmenn kjörna. Sennilega mun flokkurinn taka þá frá Sjálfstæðisflokknum og Frjálslynda flokknum. En hugsanlegt er einnig , að nýi flokkurimnn taki eitthvað fylgi frá Vinstri grænum.Það virðist ekki vera mikill grundvöllur fyrir flokki eins og Íslandshreyfingunni.Aðrir flokkar eru að berjast fyrir sömu málum og nýi flokkurinn. Samfylkingin berst fyrir umhverfisvernd samkvæmt nýrri stefnu, Fagra Ísland.Og allir aðrir flokkar tala meira og meira um umhverfismál. Meira að segja Sjálfstæðisflokkurinn er farinn að tala um umhverfismál. Og allir stjórnmálaflokkar nema  þá helst Vinstri grænir aðhyllast markaðsbúskap. 

 Björgvin Guðmundsson

Mesta ranglæti Íslandssögunnar

Úthlutun á  ókeypis aflaheimildum til örfárra útvalinna gæðinga er eitthvert mesta ranglæti sem átt hefur sér stað, sennilega mesta ranglæti Íslandssögunnar. Þeir, sem fengu fríar aflaheimildir, hafa getað braskað með þær og þeir hafa margir hverjir óspart gert það. Sumir bleyta aldrei færi, leigja bara aflaheimildirnar út og hafa gott upp úr því.Aðrir hafa selt frá sér alla kvótana og hætt veiðum.Dæmi eru um að menn hafi fengið marga milljarða fyrir  kvóta,sem þeir hafa selt.Þeir hafa sumir hverjir selt kvóta, sem þeir fengu fría, selt heimildir,sem þeir í raun áttu ekki, þar eð þjóðin á fiskinn í sjónum.Fiskurinn er sameiginleg auðlind þjóðarinnar. Nauðsynlegt er að breyta þessu fyrirkomulagi.Það verður að afhenda þjóðinni veiðiheimildirnar á ný. Og síðan verða allir sem fá veiðiheimildir að greiða fyrir afnot þeirra.

  Óbreytt stefna Samfylkingar 

Samfylkingin samþykkti svohljóðandi á landsfundi 2003: "Samfylkingin stefnir  að því að endurheimta sameiginlega auðlind þjóðarinnar, fiskinn í sjónum, með markvissri innköllun og endurúthlutun veiðiheimilda þar sem opnaður er aðgangur að veiðiréttinum með jafnræði og réttlæti að leiðarljósi. Þessi leið færir komandi kynslóðum aftur réttinn til arðs og aðgangs að sameiginlegri auðlind, tryggir nýliðun í útgerð og færir íbúum sjávarbyggðanna á ný réttinn til að nýta þá auðlind sem skóp þær."Þessari stefnu hefur ekki verið breytt.Hún er enn í fullu gildi. Aðaltilgangur kvótakerfisins var að vernda þorskstofninn. En það hefur mistekist. Ástand þorskstofnsins er verra í dag en áður en kerfið var sett.

 Framsókn höfundur kerfisins 

Það var Framsóknarflokkurinn sem setti kvótakerfið á og á því höfundarrétt að því. Að vísu var vitað, að LÍU lagði tillögurnar um kvótakerfið fyrir sjávarútvegsráðherra Framsóknar. LÍU og Framsókn bera ábyrgð á þessu kerfi, sem skapað hefur mestu tekjutilfærslur allra tíma í þjóðfélaginu. Þessu kerfi verður að breyta. 

Er þetta stjórnarskrárbrot? 

Það stendur í lögunum um stjórn  fiskveiða, að fiskurinn í sjónum sé sameign þjóðarinnar. Eða eins og stendur orðrétt í 1.grein laganna:” Nytjastofnar á Íslandsmiðum eru sameign íslensku þjóðarinnar”. Eignarrétturinn  nýtur  friðhelgi stjórnarskrárinnar.Hvernig er þá unnt að selja eign þjóðarinnar sem nýtur friðhelgi stjórnarskrárinnar. Er það ekki stjórnarskrárbrot? Það þyrfti að láta reyna á þetta ákvæði fyrir dómstólum. Ég tel, að það sé óheimilt að selja kvótana. Það er kominn tími til,að tekið sé í taumana, braskið með kvótana sé stöðvað og   þjóðin endurheimti sameiginlega auðlind sína,fiskinn í sjónum. 

Björgvin Guðmundsson   

Samfylkingin vill umhverfisvernd

 

Fagra Ísland, stefna Samfylkingarinnar í umhverfismálum, er hið merkasta plagg. Kjarni stefnunnar er sá, rétta beri hlut náttúruverndar gagnvart hagsmunum stóriðju og að úttekt verði gerð á  virkjana- og stóriðjukostum landsmanna. Á meðan sú úttekt fari fram verði gert hlé á  frekari framkvæmdum á þessu sviði. Þetta er róttæk en skynsamleg stefna.Það er ekki unnt að halda áfram á sömu braut  og áður. Við getum ekki haldið áfram að virkja óheft alla helstu fossa landsins með öllu .því raski  á náttúru landsins sem  því fylgir. Við þurfum einnig að staldra við  og athuga hvort  ekki eru komnar nægilega margar stóriðnaðarverksmiðjur. Við þurfum að huga að nýjum iðnaði, úrvinnslu og nýsköpun.Mikil tækifæri eru í hugbúnaðargeiranum.

Mikil vinna var lögð í hina nýju stefnu Samfylkingarinnar í umhverfismálum.Að því verki komu margir hæfir menn.Fagra Ísland,nýja stefnan er góð stefna og skynsamleg.Umhverfisverndarsinnar geta óhikað greitt Samfylkingunni atkvæði og greitt fyrir Fagra Íslandi.

 

Björgvin Guðmundsson

 

Meirihluti Sjálfstæðisflokksins í Rvk. hækkar þjónustugjöld aldraðra

Eitt helsta kosningaloforð Sjálfstæðisflokksins fyrir borgarstjórnarkosningarnar vorið 2006 var,að bæta ætti aðbúnað og aðstöðu aldraðra. Það skýtur því nokkuð skökku við, þegar fréttir berast af því í upphafi nýs árs, að Reykjavík undir stjórn Sjálfstæðisflokksins sé að hækka öll þjónustugjöld aldraðra. Þetta eru hrein svik á kosningaloforði.Gjaldskrá vegna félagsstarfs, fæðis, veitinga og þjónustugjalda í þjónustuíbúðum aldraðra hækkuðu að jafnaði um 8,8% 1.janúar 2007.Jafnframt hækkaði verð á frístundastarfi eldri borgara um tæp 10%. Þessi hækkun er meiri en verðbólguhækkunin. Eldri borgara munar verulega um 8,8-10% hækkun, þegar haft er í huga hve lífeyrir eldri borgara er lágur. Þessi hækkun á þjónustugjöldum getur því hæglega  leitt til þess,að það dragi úr þátttöku aldraðra í félagsstarfinu í Reykjavík. Ef Sjálfstæðisflokkurinn hefði ætlað að  efna kosningaloforð sitt við aldraða hefði átt að lækka  þjónustugjöldin og auðvelda með því öldruðum að taka þátt í félagsstarfinu. En Sjálfstæðisflokkurinn fer í öfuga átt.Hann hækkar þjónustugjöldin.

 Matarverð hér 62% hærra en hjá ESB 

 Á sama tíma berast fréttir af því utan úr heimi,að matarverð hér á landi sé 62% hærra en nemur meðaltali í löndum Evrópusambandsins. Er þetta  meiri munur en áður var talað um.Munurinn á verði kjöts og brauðvara er enn meiri eða 70-80 %!  En nú ljóst, að  lækkun  matvælaverðs hér 1.mars sl. hrekkur skammt til þess að brúa þetta mikla bil á matvælaverði her og í löndum ESB..Undandarið hefur verð innfluttra matvæla verið að hækka í matvöruverslunum.Innflytjendur segja, að verðið hafi hækkað við innkaup erlendis. 

 Bitnar þungt á öldruðum 

 Hið háa matvælaverð hér og hækkanir á því bitna þungt á öllu láglaunafólki og ekki síst á öldruðum.Um þriðjungur aldraðra eða um 10 þúsund manns hafa aðeins rúmar 100 þúsund krónur í tekjur á mánuði. Hið geysiháa matvælaverð hér á landi bitnar þungt á þessum hluta aldraðra.Verulegur árangur í því að lækka matvælaverðið næst ekki án mikillar lækkunar landbúnaðarvara. Það þarf að lækka verulega tolla á innfluttum landbúnaðarvörum og auka samkeppni á þessu sviði. Einnig þarf að lækka verð á lyfjum. Hið geysiháa lyfjaverð bitnar þungt á ölduðum. Undanfarið hefur verð á ýmsum nýjum lyfjum, svo sem krabbameinslyfjum, stórhækkað. Hefur þessi hækkun komið mjög illa við aldraða. Heilbrigðismálin eru öll í ólestri eftir langa stjórn Framsóknar og íhalds á þeim málum.Í þeim málaflokki þarf að taka til hendinni þegar ný stjórn félagshyggjuaflanna tekur við.

 

Björgvin Guðmundsson

 

 

Viljum ríkisstjórn án íhaldsins

Miklar bollaleggingar eiga sér nú stað um stjórnarmyndun eftir næstu kosningar.Stjórnarandstaðan hefur boðað, að hún muni reyna stjórnarmyndun sem fyrsta valkost nái hún þingmeirihluta. Það er mjög eðlilegt, þar eð stjórnarflokkarnir hafa verið svo lengi við völd,að eðlilegt er að þeir fái frí frá völdum, ef kjósendur hafna meirihluta þeirra.

Sjálfstæðisflokkurinn og Morgunblaðið reyna að vísu allt sem þessir aðilar geta til þess að egna fyrir VG og Samfylkingu og munu reyna fram á síðustu stundu að fá þessa aðila til fylgilags við sig. Sjálfstæðisflokkurinn hefur alltaf leikið þann leik og mun halda því áfram. Það hefur t.d. vakið mikla athygli hvað Morgunblaðið hefur gengið langt í því að egna fyrir Vinstri græna. Hver leiðarinn á fætur öðrum hefur verið skrifaður í Mbl. til þess að hæla VG og Steingrími J. og síðan birtist heilt Reykjavíkurbréf síðasta sunnudag þar sem VG var hælt á hvert reipi en Samfylkingin og Ingibjörg Sólrún nídd niður. Sennilega hefur Mbl. fengið bágt fyrir þetta Reykjavíkurbréf þar eð í byrjun vikunnar kom leiðari í Mbl. þar sem aldrei þessu vant var vikið að nokkrum mikilvægum málum sem VG er á móti en Sjálfstæðisflokkurinn  berst fyrir.

 

 Samfylkingin á ekki að fara í stjórn með íhaldinu

 

Að sjálfsögðu finnast menn innan Samfylkingarinnar,sem vilja mynda stjórn með íhaldinu. En ég er algerlega andvígur því. Ég tel, að það sé alger nauðsyn fyrir Samfylkinguna, þegar hún fer í ríkisstjórn í fyrsta sinn ,að hún myndi stjórn eða taki þátt í stjórn án Sjálfstæðisflokksins. Samfylkingin er stofnuð til þess að berjast við Sjálfstæðisflokkinn og fyrir málefnum jafnaðarstefnunnar. Sjálfstæðisflokkurinn stendur helst í vegi fyrir umbótamálum jafnaðarmanna. Sjálfstæðisflokkurinn er málssvari græðgishyggjunnar,fjármagnseigenda og stóratvinnurekenda. Flokkurinn hefur bætt aðstöðu þessara aðila stórlega undanfarin ár á kostnað launafólks. Misskipting  og ójöfnuður hefur stóraukist í þjóðfélaginu. Samfylkingin ætlar að leiðrétta misskiptinguna.

 

 Björgvin Guðmundsson

Morgunblaðið gegn Ingibjörgu Sólrúnu!

Morgunblaðið hefur lengi undanfarið rekið harðan áróður gegn Ingibjörgu Sólrúnu Gísladóttur formanni Samfylkingarinnar.Hafa margir undrast þennan heiftarlega áróður  og ekki skilið hvers vegna Mbl. hefur ekki unnt Ingibjörgu Sólrúnu sannmælis. Skýringin á þessari neikvæðu afstöðu Mbl. gegn Ingibjörgu Sólrúnu er sú, að Sjálfstæðisflokkurinn hefur aldrei jafnað sig á því að Ingibjörg Sólrún skyldi sem leiðtogi R-listans fella Sjálfstæðisflokkinn í borgarstjórn Reykjavíkur. Það var mikið áfall fyrir Davíð Oddsson og Sjálfstæðisflokkinn. Það var einnig talsvert áfall fyrir Sjálfstæðisflokkinn, að Ingibjörg Sólrún skyldi fyrir 4 árum hætta sem borgarstjóri og verða forsætisráðherraefni Samfylkingarinnar í þingkosningunum 2003. Í kosningabaráttunni fyrir 4 árum fékk Samfylkingin mikið fylgi í skoðanakönnunum, alveg upp í 40 % og svo virtist um tíma sem Samfylkingin yrði stærri í þingkosningunum en Sjálfstæðisflokkurinn.Úrslit kosninganna urðu þau,að Samfylkingin fékk 31% en íhaldið 33%. Það munaði ekki mjög miklu.  Þetta var mikið áfall fyrir Davíð og  Sjálfstæðisflokkinn. Og áróðursmeistarar íhaldsins  tóku að brugga ráð gegn Ingibjörgu. Síðan hafa þeir hundelt hana og  Morgunblaðið reynt stöðugt að gera hana ótrúverðuga. Enn í dag, sbr. Síðasta Reykjavíkurbréf, er Mbl. að blása það upp, að Ingibjörg Sólrún hafi hætt sem borgarstjóri áður en kjörtímabilið var úti en þetta sama hafa fjölmargir leiðtogar Sjálfstæðisflokksins gert og ekki þótt athugavert í Mbl. Samhliða stöðugum árásum á Ingibjörgu Sólrúnu í Mbl. spinnur blaðið upp slúðursögur um forustumenn Samfylkingarinnar, sbr. söguna um það, að mikill ágreiningur sé milli Ingibjargar Sólrúnar og Össurar Skarphéðinssonar. Það er ekki nokkur fótur fyrir þessu. Þetta er alger uppspuni frá rótum. Samkomulagið milli  Ingibjargar Sólrúnar og Össurar er mjög gott. Það fór hins vegar fram lýðræðisleg kosning á milli þeirra tveggja um formennskuna í Samfylkingunni.

 Það er nú orðið svo langt síðan Ingibjörg Sólrún felldi meirihluta íhaldsins í Reykjavík, að Mbl. ætti að hafa jafnað sig á því.

 

Björgvin Guðmundsson