"Vinsældir" flokksforingja

 

 

Gallup hefur birt vinsældakönnun um flokksforingjana. Geir H.Haarde formaður Sjálfstæðisflokksins mælist vinsælastur.Það þarf ekki að koma á óvart. Formaður Sjálfstæðisflokksins mælist yfirleitt vinsælasti stjórnmálamaðurinn og virðist litlu skipta hver er í formannssætinu. Nú hefur Geir H.Haarde t.d. látið lítið að sér kveða undanfarið. Það hefur lítið heyrst í honum. En hann er samt vinsæll. Ef til vill er hann vinsælli eftir því sem minna heyrist í honum. Steingrímur J. er nr. 2 og Ómar Ragnarsson nr. 3. Síðan kemur Ingibjörg Sólrún formaður Samfylkingarinnar. Það er mikið gert úr því, að Ingibjörg Sólrún skuli ekki vera ofar á þessum lista.

 Fyrir 4 árum mældist Ingibjörg Sólrún í slíkum könnunum vinsælasti stjórnmálaforinginn og var 10 prósentustigum fyrir ofan þáverandi formann Sjálfstæðisflokksins. Hún hafði þá verið borgarstjóri og leiðtogi R-listans í 9 ár og menn voru að dæma hana af verkum sínum. Það ríkti almenn  ánægja með störf Ingibjargar Sólrúnar sem borgarstjóra og það kom fram í skoðanakönnunum. Nú er fyrst og fremst verið  að dæma eftir áróðri  fjölmiðla og Morgunblaðið hefur rekið stanslausan áróður gegn Ingibjörgu Sólrúnu og neynt að níða hana niður. Á sama tíma hefur Morgunblaðið verið að mæra Steingrím J. Blaðið vill fá Vinstri græna sem nýja hækju fyrir íhaldið í stað Framsóknar.Það hefur ekki verið rekinn eins hatrammur áróður gegn neinum stjórnmálaforingja eins og gegn Ingibjörgu Sólrúnu. Það má segja, að allir fjölmiðlar hafi þar lagst á eitt. Af þeim sökum er ekki undarlegt  þó hún mælist ekki hátt í vinsældakönnunum. En Ingibjörg Sólrún lætur engan bilbug á sér finna og Samfylkingin fylkir sér um foringja sinn og ætlar að sigra í þingkosningunum í næsta mánuði.

 Björgvin Guðmundsson

Gróf misnotkun á framkvæmdasjóði aldraðra

 

 Sem dæmi um grófa misnotkun á framkvæmdasjóði aldraðra má nefna eftirfarandi úthlutanir ráðherra Framsóknar á fjármunum úr sjóðnum:

Kr. 669.751 til Hauks Guðlaugssonar og Gunnars Kvaran vegna tónleikahalds á öldrunarstofnunum. Kr. 365.000 til samráðshóps um stöðu aldraðra vegna  ráðstefnuhalds, Kr. 1.270.198 til landlæknisembættisins vegna gagnagrunns á öldrunarsviði. Kr. 447.558 til heilbrigðis-og tryggingarráðuneytis vegna útgáfu upplýsingaritsins ný sýn ( kosningabæklingur ) Kr. 1.712.108 til rannsóknarstofu Háskóla Íslands og LSH vegna rannsókna í öldrunarfræðum. Kr. 5.052.745 til Háskóla Íslands vegna lektorsstöðu í félagsvísindadeild. Kr. 365.000 til samráðshóps um stöðu aldraðra vegna ráðstefnu um stöðu aldraðra á vinnumarkaði .Kr. 557.977 til samráðsnefndar um málefni aldraðra,nefndarlaun og kostnaður. Kr. 3.851.213 til landlæknis vegna framkvæmdar á vistunarmati. Kr. 1.713.000 til Pálma Jónssonar,læknis, vegna þróunar og aðlögunar á RAI mælitæki. Kr. 1.077.320 til Halldórs S.Guðmundssonar og Mörtu G.Bergmann vegna sjálfs-mats eldri borgara,verkefni. Kr. 500.000 til Hafnar í Hornafirði vegna verkefnis v.heimaþjónustu Kr. 500.000 til óperukórsins í Reykjavík vegna tónleikahalds á öldrunarstofnunum. Kr. 100.000 til Hrafns Pálssonar vegna útgáfu á hljómdiski. Kr. 135.000 til Bryndísar Erlingsdóttur,sjúkraþjálfara, vegna ráðstefnu í Noregi. Kr. 1 milljón til Háskóla Íslands vegna kaupa á kennslubúnaði. 1 milljón  til Jóns Hermannssonar,Tefra Film, vegna fræðsluefnis fyrir útlendinga,sem starfa við umönnun á sjúkrahúsumn  Kr. 500.000 til utanríkisráðuneytisins vegna alþjóðaþings um málefni aldraðra. 

Sjóðurinn allra gagn!

Ásta R. . Jóhannesdóttir alþingismaður fékk framangeindar upplýsingar  á alþingi sem svar við fyrirspurn. Framangreindar upplýsingar leiða í ljós, að misnotkunin á framkvæmdasjóði aldraðra hefur verið mun grófari en menn gátu ímyndað sér. Það er engu líkara en Framsóknarmennirnir í ráðherrastólum heilbrigðismála hafi notað sjóðinn sem allra gagn, veitt úr honum í allar  áttir, til tónleikahalds, þátttöku í ráðstefnum erlendis, til Háskóla  Íslands  til þess að greiða nefndarstörf og jafnvel til utanríkisráðuneytisins eins og það ráðuneyti hafi verið á horriminni og ekki geta greitt sinn eigin kostnað. Það skiptir engu máli þó  tónleikar og ráðstefnur hafi tengst eldri borgurum.

Farið langt út fyrir heimildir

Framkvæmdasjóður átti ekki að greiða slíkan kostnað. Hann átti að  greiða framkvæmdir í þágu aldraðra eins og nafnið bendir til og samkvæmt sérstökum heimildum vissan rekstur hjúkrunarstofnana fyrir aldraða,sem aldrei skyldi verið hafa. Ég tel, að heilbrigðisráðherrar Framsóknar hafi farið langt út fyrir heimildir sínar með rástöfun úr framkvæmdasjóði aldraðra.

 Björgvin Guðmundsson 

Kaffibandalagið stendur

 

 

Nokkurs taugatitrings gætir nú innan kaffibandalagsins vegna heilsíðuauglýs-

ingar Frjálslynda flokksins í Fréttablaðinu um innflytjendamálin.Í þessari auglýsingu var gefið til kynna,að Frjálslyndi flokkurinn vildi ekki að sams konar ástand myndaðist hér vegna fjölda innflytjenda og skapast hefði í grannlöndum okkar, þar sem vandamál eru mikil í tengslum við innflytjendur.Er þessari auglýsingu greinilega ætlað að draga kjósendur að Frjálslynda flokknum án þess að segja fullum fetum hvað frjálslyndir vilji gera í málum innflytjenda. Nokkrir stjórnmálafræðingar hafa sagt, að þessi auglýsing leiði í ljós, að kaffibandalagið sé búið að vera. Ekki verði unnt fyrir Samfylkingu og vinstri  græna að mynda stjórn með frjálslyndum. Þetta er of djúpt í árinni tekið. Össur Skarphéðinsso, formaður þingsflokks Samfylkingar, hefur réttilega bent  á, að  ekki eru neinar beinar tillögur í umræddri auglýsingu Frjálslynda flokksins.Hann telur ekki auglýsinguna boða endalok kaffibandalagsins.

 Reynir ekki á þetta fyrr en eftir kosningar 

 Hvað sem öllum taugatitringi líður og yfirlýsingum talsmanna Samfylkingar og Vinstri grænna um kaffibandalagið er ljóst, að bandalagið stendur á meðan ekki brýtur formlega á einhverjum mikilvægum málum. Og á það reynir ekki að fullu fyrr en eftir kosningar. Fram að kosningum verður aðeins um vægar skilmingar að ræða innan bandalagsins.

 Málflutningur Frjálslynda flokksins í innflytjendamálum virðist að hluta til byggður á misskilningi. Eitt aðalatriðið í máli frjálslyndra er, að þeir vilji fresta komu vinnuafls hingað frá EES og beita í því skyni undanþáguákvæðum EES samningsins. En það er ekki unnt að láta þessi ákvæði virka til baka. Það er einungis unnt að beita aðlögunarákvæðum og fá frest gagnvart þeim ríkjum, sem eru að ganga inn í ESB en ekki gagnvart þeim,sem þegar eru komin inn.Önnur undanþáguákvæði eiga hér ekki við. Þegar frjályndir átta sig á þessu verður ekki um  mikinn ágreining að ræða.Það verður auðvelt að ná samkomulagi um einhvern aðlögunartíma vegna vinnuafls frá ríkjum,sem ekki eru þegar komin í EES.

  

Björgvin Guðmundsson

 

Samskipti við Færeyjar aukin

 

Samskipti við Færeyjar aukin

Samskipti Íslands og Færeyja hafa löngum verið góð.Færeyingar hafa oft sótt vinnu til Íslands og Íslendingar hafa stofnað til atvinnureksturs í Færeyjum, m.a. útgerð. Ísland hefur gert fríverslunarsamning við Færeyjar. Ísland hefur nú opnað ræðisskrifstofu í Þórshöfn. Skrifstofan heyrir undir sendiráð Íslands í Kaupmannahöfn. Aðalræðismaður Íslands í Þórshöfn er Eiður Guðnason og heyrir hann undir sendiráðið í Kaupmannahöfn.Eiður var blaðamaður á Alþýðublaðinu, alþingismaður fyrir Alþýðuflokkinn og umhverfisráðherra en síðan sendiherra í utanríkisþjónustunni.

 Valgerður Sverrisdóttir,utanríkisráðherra, á þakkir skilið fyrir að opna ræðisskrifstofu í Færeyjum.

 

Björgvin Guðmundsson

Kosningin i Hafnarfirði mun hafa áhrif

Mikið er nú rætt um kosninguna í Hafnarfirði  um stækkun álversins. Fellt var með naumum meirihluta að heimila stækkun.Andstæðingar stækkunar eru ánægðir með úslitin þó mjóu hafi munað en hinir,sem vildu heimila stækkun eru óánægðir. Rannveig Rist forstjóri álversins í Hafnarfirði segir þetta eitt mesta  áfall álverksmiðjunnar.

 Það er mjög jákvætt,að sveitarfélög leggi stór og mikilvæg málefni undir dóm kjósenda.Og sjálfsagt verður meira um það í framtíðinni en verið hefur. En  ekki er sama hvernig staðið er að slíkum atkvæðagreiðslum. Álverið í Hafnarfirði hafði unnið að undirbúningi stækkunar í 8 ár. Bæjarstjórn Hafnarfjarðar hafi úthlutað álverinu lóð undir stækkaða verksmiðju. Nýtt deiliskipulag fyrir stærri verksmiðju hafði hins vegar ekki verið samþykkt og raunar var það  sú skipulagstillaga,sem borin var undir atkvæði Hafnfirðinga í kosningunni síðasta sunnudag. Það hefði verið eðlilegra, að þessi kosning hefði farið fram mikið fyrr, t.d. fyrir 4 árum.Þá hefði mátt spara mikið fé og fyrirhöfn.

 Menn velta því fyrir sér hvort kosningin um stækkun álversins í Hafnarfirði muni hafa mikil áhrif á  þróun stóriðju í landinu almennt. Tíminn einn leiðir hið rétta í ljós í því efni. Sjálfsagt mun kosningin í Hafnarfirði hafa einhver áhrif í þessu efni. Erlendir fjárfestar verða sjálfsagt eitthvað varkárari í fjárfestingum hér á landi og  svipaðra áhrifa mun ef til vill gæta að einhverju leyti hjá stórnvöldum, í  sveitarstjórnum og í landinu. Slík áhrif af völdum kosningarinnar í Hafnarfirði eru aðeins til góðs.

 

Björgvin Guðmundsson

DV og utanríkisþjónustan

DV skrifar grein um utanríkisþjónustuna 30.mars sl. Segir blaðið,að utanríkisþjónustan sé misnotuð og mikið um pólitíska sendiherra. Hafi keyrt um þverbak í þeim efnum þann stutta tíma, sem Davíð Oddsson hafi verið utanríkisráðherra en hann var rúmt ár í því embætti. Á þeim tíma tíma skipaði hann 11 sendiherra samkvæmt frásögn DV.Þar af voru 7 pólitískt skipaðir.Hefur enginn utanríkisráðherra “afrekað” svo mikið í pólitískum embættaveitingum sem þetta en fast á hæla honum kemur Halldór Ásgrímsson.

DV skýrir frá því, að  starfsmannaráð flutningsskyldra starfsmanna í utanríkisþjónustunni hafi kvartað við utanríkisráðherra vegna pólitískra embættaveitinga. Afhenti ráðið utanríkisráðherra bréf um málið. Þar segir m.a.: “Á undanförnum árum  hafa

pólitískar embættaveitingar í utanríkisþjónustunni aukist til  muna. Af forstöðumönnum

á 23 sendiskrifstofum, þar sem rekið er sendiráð, fastanefnd eða aðalræðisskrifstofa eða starfsmaður með sendiherratitil skipaður í starf hjá alþjóðastofnun, voru í mars 2007  tíu pólitískt  skipaðir eða um 45 %.” Starfsmannaráðið segir, að  þetta háa hlutfall eigi sér ekki hliðstæðu í öðrum vestrænum ríkjum.

 

Björgvin Guðmundsson

Áfram vaxtaokur á Íslandi

 

 

Seðlabankinn tilkynnti í gær,að stýrivextir yrðu óbreyttir,14,25%. Munu þetta vera hæstu stýrivextir  í Evrópu.Viðskiptabankarnir nota þessa stýrivexti sem skálkaskjól fyrir því að halda vöxtum sínum í hámarki og okra á viðskiptamönnum sínum.Sumir viðskiptabankanna eiga orðið banka erlendis og geta fengið næga fjármuni frá erlendum  bönkum á lágum vöxtum, þannig að það stenst ekki að háir vextir viðskiptabankanna séu vegna hárra stýrivaxta Seðlabankans.Seðlabankinn hefur hækkað stýrivexti sína 18 sinnum frá því í mai 2004. Þetta mun einsdæmi í Evrópu.Árið 2004 voru vextirnir 5,3%.

 

   Vonlaus barátta Seðalbankans 

 

Barátta Seðlabankans við verðbólguna virðist vonlaus eða vonlítil .Þetta er eins og barátta við vindmillur.Samkvæmt venjulegu hagfræðilögmáli eiga háir vextir að draga úr þenslu og verðbólgu. En svo virðist sem það   úrræði dugi ekki nema takmarkað á Íslandi. Íslenska hagkerfið er um margt sérstakt. Háir vextir hér á landi fara beint út í verðlagið og hækka vöruverð og þannig verka vextirnir á móti verðbólgumarkmiði Seðlabankans. Krónan hefur að vísu styrkst vegna vaxtahækkana Seðlabankans. Af þessum sökum hefur mikil  eftirspurn  verið eftir krónubréfum ( skuldabréfum) erlendis. En vegna þess hve ótryggt ástand er hér í efnahagsmálum og vegna aukins  óstöðugleika munu eigendur krónubréfanna trúlega losa við við þessi bréf síðar á þessu ári. Þegar það gerist mun íslenska krónan kolfalla og valda mikilli verðbólgu. Seðlabankinn getur ekkert ráðið við það. Það er mikil spurning hvort nokkur þörf er fyrir Seðlabankann.

 

 Björgvin Guðmundsson

Á að takmarka aðstreymi útlendinga til landsins

 Skiptar skoðanir eru um aukið aðstreymi útlendinga til Íslands. Sumir telja, að  aðstreymið hafi verið of mikið og að sporna verði við  miklum innflutningi útlendinga til landsins .Uppsveiflan í íslensku efnahagslífi hefur kallað á aukið vinnuafl og ekki hefur reynst kleift að mæta þeirri auknu eftirspurn með innlendu vinnuafli. Þess vegna hefur orðið að flytja inn erlent vinnuafl  í miklum mæli. Samtímis hefur það aukist ,að Íslendingar fáist ekki í ýmis konar þjónustustörf og því eru útlendingar í æ ríkari mæli ráðnir í þau. Um langt skeið hefur verið erfitt að manna frystihúsin með Íslendingum og því er það nú algengt,  að Pólverjar og aðrir útlendingar haldi fiskvinnslunni uppi í frystihúsum. Margir hafa áhyggjur af þessari þróun. Og ýmsir öfgamenn vilja banna innflutning á erlendu vinnuafli.Þeir, sem ganga lengst í öfgunum, vilja senda útlendinga aftur úr landi.

 EES er einn vinnumarkaður 

Hvað er til ráða í þessu efni? Ísland er aðili að Evrópska efnahagssvæðinu (EES) og þar er einn vinnumarkaður með frjálsu flæði vinnuafls. Það þýðir, að fólk  á EES svæðinu getur komið til Íslands til þess að vinna án þess að framvísa atvinnuleyfi.Fólk frá Austur-Evrópu-ríkum, sem eru í EES,  þarf því ekki atvinnuleyfi til þess að fá vinnu á Íslandi. Það getur því komið til Íslands án þess  tryggja sér atvinnu fyrst .Er þá ekkert unnt að gera til þess að draga úr straumi erlends vinnuafls frá EES svæðinu?. Jú það er ýmis legt unnt að gera. Það má t.d. setja ýmis skilyrði svo sem að fólk, sem ráðið er til þjónustustarfa,  verði að kunna íslensku. Það er eðlilegt krafa, þar eð fólk sem vinnur t.d. á sjúkrahúsum og dvalarheimilum aldraðra verður að geta talað við sjúklinga og vistmenn á íslensku .Sama gildir raunar um afgreiðslustörf og ýmis önnur þjónustustörf.  Í dag eru útlendingar að vinna  á elliheimilum án þess að tala íslensku og án þess að geta talað við sjúklingana. Það gengur ekki. Ef skilyrði væru sett um íslensku kunnáttu mundi það draga úr straumi erlends vinnuafls hingað og það mundi leiða til þess að menn yrðu að læra íslnesku áður en þeir hæfu störf eða að öðrum kosti að  hætta við að vinna hér á landi. Fólk utan EES svæðisins þarf atvinnuleyfi hér á landi og  unnt er  að neita því um atvinnuleyfi  hér,  ef við teljum orðið of mikið af erlendu vinnuafli í landinu.  

Fordómar gagnvart útlendingum  

Nokkuð ber á fordómum hér gagnvart útlendingum.Einkum virðast menn hræddir við Múslima og fólk frá Arabalöndunum.Að vísu er mjög fátt hér um slíkt fólk.En margir virðast telja, að flestir Arabar séu hryðjuverkamenn. Það er auðvitað fráleitt.Og margir vilja kenna útlendingum um allt sem aflaga fer hér í næturlífi. Ef útlendingar eru viðriðnir  obeldi á almannafæri eru fjölmiðlar mun dómharðari í þeirra garð en ef Íslendingar eiga í hlut.Auðvitað eru útlendingar, sem setst hafa hér að misjafnir eins og Íslendingar.Það gengur ekki að dæma alla útlendinga, sem hér búa,  eftir nokkrum svörtum sauðum.Margir útlendinganna eru ágætis fólk. Það er t.d. látið mjög vel af Pólverjum sem vinnukrafti í frystihúsum landsins og  yfirleitt eru þeir ekki til neinna vandræða. 

Erlent vinnuafl mikilvægt  

Við verðum að átta okkur á því, að eins og staðan er í íslensku atvinnulífi í dag er ekki unnt að reka það án erlends vinnuafls. Það yrði  erfitt að reka spítalana og ýmsar aðrar þjónustustofnanir, ef erlends vinnuafls nyti ekki við. Og frystihúsin mundi sennilega stöðvast,  ef Pólverjarnir færu. Hins vegar þarf að leggja mikla áherslu á, að  útlendingarnir aðlagist íslensku þjóðfélagi. Mikilvægast er í því sambandi, að þeir læri íslensku .Í því  efni hefur til þessa verið mikill slappleiki. Það verður að herða á í  þvi efni. Algert skilyrði er, að allir, sem vinna þjónustustörf tali íslensku. 

Björgvin Guðmundsson

Skattar á öldruðum hækkaðir

Skattbyrði aldraðra hefur stóraukist í valdatíð núverandi stjórnarflokka. Ef litið er á skatta 66-70 ára kemur í ljós,að á tímabilinu 1994-2004  hafa skattar þeirra aukist úr 18,2% af tekjum í 27,3% eða alls um 9,1 prósentustig.Skattar 71-75 ára hafa á sama tímabili aukist úr 11,1% í 24,2% eða um 13,1 prósentustig og  skattar 76 ára og eldri hafa aukist á sama tímabili úr 7,6% í 21,4% eða um 13,8 prósentustig. Á sama tíma hafa skattar meðalfjölskyldunnar hækkað úr 19,2% í 23,7% eða um 4,5 prósentustig. Eða m.ö.o.: Því eldra sem fólk er og því lægri sem tekjurnar eru þeim mun meiri er aukning skattbyrðarinnar.

 Skattar hálaunafólks lækkaðir 

Á sama tíma og þetta hefur gerst hafa skattar hálaunafólks og fyrirtækja verið lækkaðir. Hátekjuskattur var felldur niður. Stefna ríkisstjórnarinnar hefur komið vel fram í skattamálunum og  í framkomunni gagnvart öldruðum. Það er ekki aðeins,að lífeyri aldraðra hafi verið haldið niðri svo þeir fá aðeins hungurlús frá almannatryggingum heldur hefur á sama tíma verið  níðst á þeim með því að hækka á þeim skatta.

 

Björgvin Guðmundsson