Ljúka á samningaviðræðum við ESB

Sú ákvörðun ríkisstjórnarinnar að hægja á samningaviðræðum við ESB er umdeild.Þetta var málamiðlun milli stjórnarflokkanna.VG telur,að ESB málið hafi skaðað flokkinn að því er fylgi varðar og þess vegna vildi VG ,að  viðræður yrðu stöðvaðar eða verulega hægt á þeim fram að kosningum.Sættst var á að hægja á viðræðunum.Sennilega breytir það ekki miklu, þar eð erfiðustu kaflarnir, þ.e. um landbúnaðar-og sjávarútvegsmál hefðu sennilega  hvort sem er ekki verið opnaðir fyrir kosningar.

En aðalatriði þessa máls er að ljúka verður samningaviðræðum og ganga frá drögum að samningi sem lagður verði fyrir þjóðina í þjóðaratkvæðagreiðslu.Hvernig svo sem kosningarnar fara verður að fara þessa leið. Það kemur ekki til greina að fresta eða slíta viðræðunum við ESB áður en þeim er lokið. Það er ekki siðaðra manna háttur. Ísland bað um þessar viðræður og getur þess vegna ekki hlaupið frá þeim í miðjum klíðum.Það er heldur ekkert að óttast í þessu efni. Þeir,sem eru andvígir aðild að ESB eru sannfærðir um, að þjóðin muni fella aðild.Þess vegna ættu þeir ekki að óttast þjóðaratkvæði um aðildarsamning. Og fylgjendur aðildar að ESB hafa lýst því yfir, að þeir vilji leggja aðildarsamning fyrir þjóðina og við það vilja þeir standa.Strax  eftir kosningar þarf því að setja fullan kraft á viðræðurnar og ljúka þeim sem fyrst svo þjóðin fái að kveða upp sinn dóm um málið.

Björgvin Guðmundsson