Steingrímur J.:Stöndum við skuldbindingar okkar

Steingrímur Sigfússon fjármálaráðherra skýrði afstöðu ríkisstjórnarinnar í Icesave málinu í viðtali í fréttaskýringarþættinum Deadline á DR2 í gærkvöldi. Þar áréttaði hann að Íslendingar hyggist standa við skuldbindingar sínar. Þá sagðist hann hafa fengið góð viðbrögð frá fjármálaráðherrum hinna Norðurlandanna um lán.

Hann sagði að allt liti út fyrir að þjóðaratkvæðagreiðslan fari fram og ríkisstjórnin vonist til þess að þjóðin eigi eftir að styðja málið. Þjóðin sé síðustu daga farin að átta sig á því hversu nauðsynlegt sé að leysa úr málinu halda áfram efnahagsuppbyggingunni í landinu.

Steingrímur sagði að ríkisstjórnin muni ekki gefast upp þó málinu yrði hafnað í þjóðaratkvæðagreiðslu. Það myndi ekki þýða Íslendingar ætli sér ekki að standa við alþjóðlegar skuldbindingar sínar. Ríkisstjórnin yrði að fara aftur að samningaborðinu til að reyna að ná fram lausn sem íslensku þjóðinni hugnaðist betur.

Fréttamaður DR2 spurði Steingrím hvernig kjósendum yrði við ef þeir höfnuðu Icesave málinu en ríkisstjórnin myndi samt sem áður ákveða að láta það fram ganga. Steingrímur sagði að þá myndi augljóslega meiri vandi blasa við. Ríkisstjórnin muni þó ekki gefast upp og það myndi ekki breyta því að Íslendingar séu enn staðráðnir í að leysa málið með þeim hætti að Íslendingum verði kleirft að standa við alþjóðlegar skuldbindingar sínar.  En þá þyrftu Íslendingar vitaskuld að setjast að samningaborðinu og semja um skilmála og ráðstafanir sem íslenska þjóðin gæti betur unað við.

Hvort sem svarið verður já eða nei, berst reikningurinn eftir sem áður til skattgreiðenda á Íslandi, spurði þá fréttamaður DR2. Steingrímur svaraði spurningunni játandi, en sagði að ríkisstjórnin myndi gera allt sem hún gæti til að lágmarka tap og kostnað.  Engum líki Icesave málið og erfitt að réttlæta að skattgreiðendur taki á sig slíkar byrðar. Hins vegar verði að finna leiðir til að halda áfram og það sé best að gera með því að reyna að leysa úr Icesave málinu. Þegar hafi góður árangur náðst í efnahagslegri uppbyggingu landsins síðustu mánuði og útlitið fyrir árið 2010 séu betri en vonast hafi verið til.

Steingrímur telur of snemmt að spá fyrir til um niðurstöðuna. Verði Icesave málinu hafnað í þjóðaratkvæðagreiðslu myndi það gera stöðu ríkisstjórnarinnar erfiða og fyrir hann sérstaklega sem fjármálaráðherra því hann hafi lagt mikla vinnu í málið. Ísland þurfi hins vegar síst á stjórnarkreppu að halda við núverandi aðstæður, þó það mætti færa rök fyrir því út frá lýðræðissjónarmiðinu að það væri það sem ríkisstjórnin ætti að gera.

Steingrímur reifaði hvernig rannsókn á bankahruninu væri að vinda fram. Hann segir að ef í ljós komi að peningum hafi verið komið undan ólöglega verði reynt að ná þeim aftur og þeir sem sekir hafi verið um slíkt sóttir til saka. Steingrímur sagðist vonast til að hægt væri að treysta á alþjóðlega samvinnu í þeim efnum. Hann býst hinsvegar ekki við að upphæðirnar nái upp í nema brot af tapinu. Þetta sé meira spurning um réttlæti og að allt verði gert til að láta þá sem ábyrgir séu taka út refsingu. 

Allt verði gert til að takmarka kostnað og tap og það eigi líka við í Icesave málinu. Reynt verði að ná fram sanngjarnri niðurstöðu sem taki mið af efnahagslegum aðstæðum hér á landi og þeirri staðreynd að Íslendingar séu aðeins 317 þúsund.

Stjórnvöld reyna nú hvað þau geta að koma í veg fyrir að Norðurlöndin tefji lánafyrirgreiðslu sína vegna Icesave. Þau leggja nú sameiginlegt mat á stöðuna, en fjármálaráðherra Noregs segir að höfnun laganna í þjóðaratkvæðagreiðslu þurfi ekki að skipta máli.
(ruv.is) 

Steingrímur hefur staðið sig vel að undanförnu.Hann hefur átt fundi með fjármálaráðherrum margra Norðurlanda og hefur skýrt málstað Íslands í Icesave málinu. Ráðherrarnir hafa sýnt málstað Íslands skilning,einkum fjármálaráðherrar Noregs og Danmerkur svo og utanríkisráðherra Noregs.

 

Björgvin Guðmundsson

 

•