Verið að vernda fjármagnseigendur en ekki almenning

 Gagnrýni hefur aukist vegna  þess,að ekki hefur verið tekið nægilega vel á skuldavanda heimilanna. Almenningi finnst,að það sé einungis verið að   lengja í skuldunum og fresta greiðslum en ekki sé verið að fella niður hluta höfuðstóls eins og krafan er um.Það hefur verið rifjað upp nú að  bankarnir eyddu hundruðum milljörðum í að kaupa skuldabréf af peningamarkaðssjóðum til  þess að þeir gætu greitt út til þeirra sem áttu peninga í þessum sjóðum.Með þesu var fyrst og fremst verið að vernda hag fjármagnseigenda  en aðeins lítill hluti gekk til hins venjulega manns.Sama er að segja um afskriftir á skuldum fyrirtækja í bönkunum. Skuldir fyrirtækja eru færðar niður um 2/3 en ekki hefur bólað á slíkri niðurfærslu  á skuldum heimilanna.Þó hefur AGS sagt,að það sé svigrúm hjá bönkunum til þess að færa  niður skuldir heimilanna. En slík niðurfærsla lætur á sér standa. Verðtrygging skulda er einnig í hag fjármagnseigendum,bönkum og lífeyrissjóðum. Hún tryggir í bak og fyrir skuldir  almennings í hag fjármagnseigendum.Lántakandi verður alltaf að borga með fullu vísitöluálagi. Þetta kerfi gengur ekki lengur, því verður að breyta. Það er kominn tími til þess að afskrifa hluta af höfuðstól skulda heimilanna. Það er ekki lengur unnt að mismuna þannig,að einungis séu færðar niður skuldir fyrirtækja og fjármagnseigenda. Röðin er komin að heimilunum og þó fyrr hefði verið.

 

Björgvin Guðmundsson