Formannafundur LEB mótmælti kjaraskerðingum eldri borgara

Formenn eða fulltrúar  35 félaga eldri borgara víðs vegar af landinu sóttu fyrsta formannafund LEB sem haldinn var 19. janúar sl.  Talsvert var rætt um hagsmunamál eldri borgara, mótmælt kjaraskerðingum sem urðu á síðasta ári og krafist leiðréttingar í þeim efnum.

Þá var fjallað  um aðbúnað eldra fólks , vistunarmat, þjónustu og fleira þessháttar og lögð áhersla á að þörf væri á  miklum breytingum til batnaðar. Aðildargjöld félaganna voru lækkuð  um helming á síðasta landsfundi sem haldinn var 13. og 14. maí  á síðasta ári vegna bágrar fjárhagsstöðu Félags eldri borgara í Reykjavík og nágrenni, eða úr 700 krónum á  ári í 350 krónur á hvern félaga. Af þessum sökum var ekki unnt að gefa út nema eitt tölublað af málgagni LEB, Listinni að lifa á síðasta ári. Samþykkt var að aðildargjaldið yrði 400 krónur á hvern félaga fram að næsta landsfundi sem haldinn verður á næsta ári. Ljóst er því að ekki verður unnt að gefa út Listina að lifa í ár nema styrkur til útgáfunnar komi annars staðar frá. Ný heimasíða var opnuð og kynningarblöðungi á LEB og helstu baráttumálum dreift en blöðunginn má sjá hér á síðunni undir útgáfa.

 

Björgvin Guðmundsson