Ríkisstjórnin boðar nýjar aðgerðir til lausnar skuldavanda heimila

Ríkisstjórnin undirbýr nú aðgerðir til lausnar skuldavanda heimilanna. Í því verður meðal annars tekið á réttarstöðu skuldara og vanda þeirra sem tóku bílalán. Óvíst er hvort takist að semja um afskriftir bílalána.

Ríkisstjórnin boðaði í gær aðila vinnumarkaðarins á sinn fund þar sem hún fór yfir stöðu mála. Þar kom fram að ríkisstjórnin hyggst leggja fram frumvarp í næstu í viku sem taka á á vanda skuldsettra heimila auka skilvirkni þeirra úrræða sem eru í boði.  Í frumvarpinu verður staða lántakenda gagnvart lánadrottnum bætt sem og þau réttarúrræði sem í boði eru. Þá verða kynnt sérstök úrræði til lausnar vanda bílalánþega.

Ganga þau út á að hluti bílalána verði afskrifaður. Fram kemur í Fréttablaðinu í dag að hugmyndin sé að ábyrgð lána verði aldrei hærri en 110% af verðmæti bifreiðarinnar. Samkvæmt heimildum fréttastofu leggur félagsmálaráðherra mikla áherslu á að ná þessu fram en á enn nokkuð langt í land. Þá eru uppi efasemdir um að eignaleigufyrirtækin þoli svo miklar afskriftir og verði þau knúin til þess gæti myndast skaðabótaskylda á hendur ríkinu.

Á fundinum í gær gagnrýndu aðilar vinnumarkaðarins ríkisstjórnina fyrir seinagagn í atvinnumálum. Óánægjan beindist til dæmis að því að ríkisstjórnin hafi ekki greitt götu stórframkvæmda eins og framkvæmda við álver í Straumsvík og Helguvík líkt og gert er ráð fyrir í stöðusáttmálanum. Eins lýstu nokkrir fundargesta furðu sinni á að ekki skuli hafa verið ráðist í gerð Vaðlaheiðaganga. Samkvæmt heimildum fréttastofu strandar sú framkvæmd á vilja vinstri-grænna til að setja framkvæmdina í hendur einkaaðila. (visir.is)

Gagnrýni á ríkisstjórnina hefur aukist mikið að undanförnu,einkum vegna þess,að menn telja ekki hafa verið gert  nægilega mikið til þess að leysa skuldavanda heimilanna.Það vantar lækkun á höfuðstól skulda einstaklinga en ekki aðeins frestun eða lengingu skuldanna.

Björgvin Guðmundsson