Unglæknar segja Landspítalann brjóta vinnulöggjöfina

Birna Jónsdóttir, formaður Læknafélags Íslands, segir nýtt vaktafyrirkomulag unglækna hjá Landspítalanum vera lögbrot og til þess fallið að auka hættu á mistökum. Félagið styður fyrirhugaðar aðgerðir þeirra en um 70 unglæknar ætlar að hætta hjá spítalanum um mánaðamótin í mótmælaskyni.

Megn óánægja er á meðal unglækna hjá Landspítalanum vegna nýs vaktafyrirkomulags sem þeir segja að auki vinnuskyldu þeirra til muna. Björn Zöega, forstjóri Landspítalans, sagði fyrirhugaðar aðgerðir þeirra ólöglegar í sjónvarpsfréttum RÚV í gærkvöldi. Birna Jónsdóttir, formaður Læknafélagsins, segir að samkvæmt upplýsingum félagsins standi til að skipuleggja vinnu unglækna þannig að þeir vinni meira en 48 stundir  á viku að jafnaði  á viðmiðunartímabili sem séu fjórir mánuðir.  Samkvæmt vinnutímatilskipun ESB sé það ólöglegt. Ekki megi skipuleggja vinnu fólks þannig.

Hún bendir einnig á að þreyttur læknir sé líklegri til að gera mistök en sá sem er úthvíldur. Í vaxandi mæli sé tekið hart á því þegar læknar sleppi því að hvíla sig eðlilega.

Birna segir unglæknana í fullum rétti að hætta hjá Landspítalanum í mótmælaskyni um mánaðamótin. Lögmaður læknafélagsins telji unglækna í fullum rétti að ganga út því þeir hafi mótmælt því að þetta fyrirkomulag sé viðhaft. Læknafélaginu beri að standa vörð um kjarasamninga og því styðji félagið aðgerðirnar. Félagið geti ekki samþykkt lögbrot og að brotið sé á ungu læknunum.(ruv.is)

Lanspítalinn verður að fara að lögum og virða vinnutímatilskipun  ESB enda þótt það þurfi að spara á Landspítalanum.

 

Björgvin Guðmundsson