Gosið er nú stöðugra

Jarðvísindamenn segja gosið í Eyjafjallajökli vera stöðugra en áður en ómögulegt sé að spá um þróun þess og öskufall. Í einum ískatlinum í jöklinum er að myndast gjall- og klepragígur.

Jarðvísindamenn flugu yfir gosstöðvarnar í dag í flugvél Landhelgisgæslunnar. Skyggni var af skornum skammti en ágæt radarmynd náðist. Þar sjást greinilega ískatlar sem mynduðust á fyrstu dögum gossins. Í einum katlinum er að myndast gjall- og klepragígur. „Gosið hefur náð ákveðnu jafnvægi. Svo lengi sem það heldur áfram þá hleður það upp þennan gjall- og klepragíg. Hraunið mun væntanlega renna áfram til norðurs og það mun smám saman éta jökulinn,“ segir Björn Oddsson, jarðfræðingur á Jarðvísindastofnun HÍ.

Breytingarnar á gosstöðvunum koma vel fram á radarmyndum sem hafa verið teknar síðustu daga. Áfram má búast við einhverju öskufalli.(ruv.is)

Björgvin Guðmundsson