Mannréttindaráðuneytið kanni hvort mannréttindi hafi verið brotin á eldri borgurum

 

Fyrir nokkru sendi ég dómsmála-og mannréttindaráðuneytinu erindi þess efnis að ráðuneytið kannaði hvort framin hafi verið mannréttindabrot á eldri borgurum ( ellilífeyrisþegum) með því að hækka ekki lífeyri aldraðra á sl. ári til samræmis við þá kauphækkun,sem verkafólk fékk á því ári. Hinn 1.júlí sl. voru kjör aldraðra skert en sama dag hækkaði kaup verkafólks.Í lögum um málefni aldraðra segir,að aldraðir eigi að njóta jafnréttis á við aðra þegna þjóðfélagsins. Ísland er aðili   að ýmsum mannréttindasáttmálum,sem kveða á um að aldraðir eigi að njóta vellíðan á efri árum.Gert er ráð fyrir,að stjórnvöld stígi ekki skref til baka í velferðarmálum aldraðra nema áður hafi verið kannaðar allar aðrar leiðir til sparnaðar.Það var ekki gert áður en kjör aldraðra voru skert 1.júlí sl.

Margir töldu það mikla framför, þegar stofnað var hér á landi sérstakt mannréttindamálaráðuneyti.Dómsmálaráðherra er einnig mannréttindamálaráðherra.Fróðlegt verður að sjá hvernig hið nýja ráðuneyti tekur á erindi mínu um hugsanleg mannréttindabrot.Í málum sem þessum er unnt að fara tvær leiðir: Það er unnt að taka jákvætt á málinu og kanna hvort líkur séu á því að mannréttindabrot hafi verið framin.Eða það er unnt að stinga erindi sem þessu undir stól,vísa því út og suður og milli manna í því skyni að  drepa málið. Því verður ekki trúað að hið nýja mannréttindaráðuneyti fari seinni leiðina. Það hlýtur að fara þá fyrri.

 

Björgvin Guðmundsson