Öryrkjabandalagið mótmælir

Aðalstjórn Öryrkjabandalags Íslands mótmælir harðlega niðurskurðaráætlunum í félagsmála- og tryggingaráðuneytinu. Ráðherrann, Árni Páll Árnason, boðaði 10 milljarða niðurskurð fyrir helgi.

Í ályktun öryrkja segir meðal annars: „Það er skýlaus krafa Öryrkjabandalags Íslands að ríkisstjórnin láti af þeirri aðför sem hún hefur stundað gegn lífeyrisþegum og láglaunafólki, en fari að forgangsraða að nýju með félagsleg gildi í fyrirrúmi."

Ályktunina má lesa í heild sinni hér fyrir neðan.

Aðalstjórn Öryrkjabandalags Íslands mótmælir harðlega að enn á ný skuli þessi ríkisstjórn sem kennir sig við „velferð” ráðast að félagslega kerfinu með því offorsi sem félags- og tryggingamálaráðherra boðaði síðastliðinn föstudag 14. maí. Kominn er tími til að leggja af verðmætamat frjálshyggjunnar.

Allt frá janúar 2009 hafa lífeyrisþegar orðið að bera hlutfallslega mestar byrðar vegna bankahrunsins, þar sem óprúttnir fjárglæframenn mökuðu krókinn á kostnað skattborgaranna. Allt síðastliðið ár dundu skerðingar á örorku- og ellilífeyrisþegum í formi skerðinga á lífeyri eða auknum lyfjakostnaði og hækkun komugjalda.

Það er skýlaus krafa Öryrkjabandalags Íslands að ríkisstjórnin láti af þeirri aðför sem hún hefur stundað gegn lífeyrisþegum og láglaunafólki, en fari að forgangsraða að nýju með félagsleg gildi í fyrirrúmi. 

Ég tek undir með stjórn Öryrkjabandalagsins.Ég styð málflutning Öbi heilshugar.

 

Björgvin Guðmundsson