Lykilstjórnendur Kaupþings hafa ekki gert upp lán sín

Nokkrir starfsmanna gamla Kaupþings hafa þegar gert upp lán sín við slitastjórn bankans, en ákveðið var fyrir tíu dögum að rifta niðurfellingu ábyrgða starfsmannanna á lánum til hlutafjárkaupa í bankanum. Áttatíu starfsmenn tóku slík lán fyrir hrun. Slitastjórnin ákvað að gefa fólkinu tíu daga frest til þess að gera lánin upp eða semja um þau. Margir hafa óskað eftir lengri fresti og hefur hann verið framlengdur hjá flestum.

Þeir sem hafa gengið frá sínum málum eru í þeim hópi sem fékk lánaðar fjárhæðir í lægri kantinum en langstærstur hluti lánanna var til tuttugu lykilstjórnenda bankans. Þau lán hlupu á milljörðum króna. Enginn þeirra hefur gert upp við slitastjórnina. Ólafur Garðarsson, formaður slitastjórnarinnar, segir að flestir hafi fengið frest fram í miðjan júní. Fólk sé að ráðfæra sig við lögfræðinga sína og mikið sé um fundahöld. Reyna á að rifta flutningi lána yfir í eignarhaldsfélög og segir Ólafur að fyrstu stefnurnar í  að þeim málum verði birtar á næstu dögum. Hann telur meiri líkur en minni á því að þeim flutningum verði rift.(ruv.is)

Það var rétt ákvörðun hjá slitastjórn Kaupþings að rifta niðurfellingu ábyrgða starfsmanna bankans.En erfitt verður fyrir starfsmennina fyrrverandi að gera upp lánin og sjálfsagt verða einhver gjaldþrot af þessum sökum.

 

Björgvin Guðmundsson