Hagstofan: 2,9% samdráttur í landsframleiðslu í ár

Útlit er fyrir að árið 2010 dragist landsframleiðsla saman um 2,9%. Hagvöxtur verður hinsvegar jákvæður frá 2011 og út spátímann miðað við að stóriðjuframkvæmdir hefjist þá af fullum krafti og að geta heimilana til einkaneyslu verði ekki fyrir frekari skakkaföllum.

 

Þetta kemur fram í Þjóðhagsspá Hagstofu Íslands fram til ársins 2015 sem birt hefur verið á vefsíðu stofnunarinnar. Þar segir að gert er ráð fyrir að heimilin hafi náð að stöðva samdrátt einkaneyslu þrátt fyrir að kaupmáttur ráðstöfunartekna dragist enn saman.

 

Samneysla heldur áfram að dragast saman til 2012 en þá hægir á samdrættinum, sem snýst í vöxt árið 2014. Gert er ráð fyrir að efnahagsáætlun ríkisins og Alþjóðagjaldeyrissjóðsins gangi eftir.

 

Verðbólga fer hjaðnandi og nálgast verðbólgumarkmið Seðlabankans seinni hluta spátímans. Reiknað er með að kjarasamningum síðar á árinu ljúki án mikilla launahækkana. Atvinnuleysi minnkar jafnt og þétt frá 2011 þegar hagvöxtur verður jákvæður.

 

Afgangur af vöru- og þjónustuviðskiptum við útlönd verður mikill allan spátímann en viðskiptajöfnuður verður eigi að síður óhagstæður.(visir,is)

 

Björgvin Guðmundsson