Staða heimilanna batnar mikið

Staða fjölda heimila gjörbreytist til batnaðar verði lán leiðrétt í takti við dóm Hæstaréttar í gær, þegar hann dæmdi að gjaldeyrisbinding lána sé ólögmæt. Í dómi Hæstaréttar er skýrt kveðið á um að verðtrygging lána með tengingu við annað en neysluverðsvísitölu sé ólögmæt, þar með sé þá gengisbinding lána ólögmæt, án tillits til þess til hve langs tíma þau hafi verið tekin eða hvort þau hafi verið tekin til bílakaupa eða einhvers annars. Hæstiréttur kvað ekki upp úr um neitt annað varðandi lánasamningana, hvorki að verðtryggja megi þá með tengingu við vísitöluna né að breyta megi vöxtum. Gangi allt eftir, eins og ráða má af dómnum, verða áhrifin mikil. Langtímalán, sem hafði hækkað um 120 til 160%, lækkar einfaldlega aftur sem því nemur, að teknu tilliti til afborgana og leiðréttinga á þeim.

Höfuðstóll til dæmis 12 milljóna króna íbúðaláns hafði hækkað í um 30 milljónir. Eiginfjárstaða heimilisins þannig orðið neikvæð. Við leiðréttingu lækkar höfuðstóllinn sem gengishækkuninni nam og staða heimilisins verður aftur jákvæð, um leið og unnt verður á ný að standa í skilum við bankann.

Algengt bílalán tekið fyrir þremur árum hefði þannig verið orðið ríflega tvöfalt vegna gengisbreytinga, en lækkar nú aftur og væntanlega verða endurgreiddar ofteknar afborganir, þannig að lánið gæti orðið óverulegt, jafnvel horfið að mestu, við leiðréttingu, að því gefnu að staðið hafi verið í skilum með allar afborganir þess.

Um þetta verða þó að gilda almennir fyrirvarar, þar sem ekki liggur enn fyrir um viðbrögð fjármálafyrirtækja né stjórnvalda við Hæstaréttardóminum, annað en yfirlýsingar um að skoða málin vandlega og ákveða að því loknu hvað gera skuli.(ruv.is)

Það er mjög jákvætt fyrir heimili,sem skulda erlend bílalán,að dómur Hæstaréttar skyldi falla þeim í hag.Það er að vísu eftir að ákveða hvernig reikna á lánin út en alla vega verða lánin mikið hagstæðari lántakendun en áður.

Björgvin Guðmundsson