Ekki kemur til greina að frysta lífeyri áfram

Eftir að félagsmálaráðherra er búinn að skerða kjör aldraðra og öryrkja mikið sl. ár og hafa af þeim réttmætar og eðlilegar kjarabætur,sambærilegar þeim er launþegar fengu kemur ráðherrann fram og segist vilja frysta áfram lífeyri aldraðra og öryrkja! Þetta er alger svívirða. Niðurskurður  ráðuneyta á yfirstandandi ári var mjög misjafn eftir ráðuneytum. Mörg ráðuneyti skáru ekkert niður,juku jafnvel útgjöld sín.Önnur skáru sáralítið niður. Það voru einkum samgönguráðuneyti og heilbrigðisráðuneyti sem skáru niður en mikið af verkefnum fluttust frá heilbrigðisráðuneyti til félagsmálaráðuneytis.Lífeyristryggingar almannatrygginga voru skornar niður um 6 milljarða en þær heyra undir félagsmálaráuneytið.Með hliðsjón af þessu  þarf ekkert að skera niður hjá almannatryggingum á næsta ári og ekki að frysta lífeyrinn.Nú er röðin komin að þeim ráðuneytum,sem ekkert skáru niður á yfirstandandi ári. Ég tek undir með formanni Landssambands eldri borgara:Það kemur ekki til greina að frysta lífeyri aldraðra lengur.

 

Björgvin Guðmundsson