Magma málið leyst í næstu viku?

Katrín Júlíusdóttir aftekur með öllu að þingflokkur VG hafi komið þeirri skýlausu kröfu á framfæri við Samfylkinguna að fundin yrði leið til að rifta kaupum kanadíska orkufyrirtækisins Magma Energy á HS Orku.

Fimm ráðherrar hittust í gær til þess að fara yfir stöðu málsins. „Við erum að vinna málið í sameiningu og það er ekki þannig að einn þingflokkurinn sé að stilla sér upp gegn hinum heldur erum við samstíga í því hvernig við ætlum að vinna þetta og við erum að fara í gegnum það núna," segir Katrín Júlíusdóttir iðnaðarráðherra.

Katrín segir að forsætisráðherra, fjármálaráðherra, iðnaðarráðherra og umhverfisráðherra hafi hist reglulega síðan í fyrravetur og fundað um auðlinda-, orku- og atvinnumál. Í gær hafi svo bæst við efnahags- og viðskiptaráðherra vegna Magma málsins. „Við erum að vinna þetta og það mun einhver niðurstaða úr þeirri vinnu líta dagsins ljós í næstu viku. Það hefur verið máluð upp mynd af einhverri ósamstöðu um málið en það er ekki djúp gjá," segir Katrín.
(visir.is)

Björgvin Guðmundsson

Athugasemdir

[Kristján P. Gudmundsson, 24.7.2010 kl. 21:42]

Þetta er ágætt, ef satt reynist, Björgvin minn. Ég vona svo sannarlega, að stjórninni takist að stytta samningstímann niður í 25-30 ár a.m.k. til að lægja reiðiöldurnar, sem brotna á þessu máli.Hafðu þökk fyrir að vekja athygli á stöðunni, það er styrkur í mönnum, sem halda ró sinni á víðsjáverðum tímum.

Með bloggvinar kveðju, KPG.