Meðallaun forstjóra 2,2 milljónir á mánuði

Meðal mánaðarlaun tvö hundruð stjórnenda íslenskra fyrirtækja voru 2,2 milljónir króna árið 2009. Ritstjóri Frjálsrar verslunar segir undarlegt hve lítið laun stjórnenda banka og stórra fyrirtækja lækkuðu árið eftir hrun.

Tekjublað Frjálsrar verslunar kom út  í dag en þar er að finna upplýsingar um laun þrjú þúsund íslendinga árið 2009. Jón G. Hauksson ritstjóri blaðsins var gestur Morgunútvarpsins í morgun, hann segir það koma verulega óvart hvað laun innan bankakerfisins og laun æðstu stjórnenda fyrirtækja breyttust lítið á milli ára.

Þrjátíu forstjórar af þeim rúmlega 300, sem Frjáls verslun tilgreinir, voru með meira en þrjár milljónir króna á mánuði, alls voru 65 með mánaðartekjur yfir tveimur milljónum. Þarna eru fimm konur en sextíu karlar.  Hæstir í þessum flokki voru Árni Pétur Jónsson fyrrverandi forstjóri Teymis og Þorsteinn Már Baldvinsson með tæpar 14 og tæpar 10 milljónir króna í tekjur. Yfirgnæfandi meirihluti alls hópsins var með meira en milljón á mánuði. Hlutfall hátekjumanna er líka hátt í fjármálafyrirtækjum, þar sem 45 eru tilgreindir með tekjur yfir tveimur milljónum króna.  Þar ber höfuð og herðar yfir aðra Geirmundur Kristinsson fyrrverandi sparisjóðsstjóri í Keflavík með 20 milljónir króna á mánuði, Óttar Pálsson í Straumi og Lárus Welding fyrrverandi forstjóri Glitnis voru með meira en tíu milljónir á mánuði í fyrra samkvæmt Frjálsri verslun. Tekjublað Mannlífs kom út nú rétt fyrir hádegi, þar eru mörg sömu nöfn og í Frjálsri verslun, en tekjuútreikningur þar er með eitthvað öðrum hætti en hjá Frjálsri verslun því þar eru að jafnaði heldur hærri laun tilgreind.

Þar eru eins og í Frjálsri verslun tilgreindar fjölmargar stéttir, meðal annars bændur; en af rúmlega fimmtíu í þeim flokki í Mannlífi, náðu átta 500 þúsund krónum á mánuði.  Langflestir hinna voru með minna en tvö hundruð þúsund.(ruv.is)

 

Menn undrast það hvað laun stjórnenda banka og stórra fyrirtækja hafi lækkað lítið eftir hrunið.Það er eins og ruglið haldi áfram. Mörg stór fyrirtæki eru tæknilega gjaldþrota og hafa verið tekin yfir af bönkunum. En samt haga þessi fyriirtæki sér eins og ekkert hafi í skorist og greiða stjórnendum sínum himinhá mánaðarlaun í stað þess að skera launin niður eins og eðlilegt er þegar fyrirtækin eru að komast í þrot.Sama er að segja um bankana. Laun bankastjóra hafa ekki verið skorin eins mikið niður og lofað var og margir hátt settir menn í bönkunum eru með himinhá laun.Á ruglið að halda áfram?

Björgvin Guðmundsson

• Innlendar fréttir