Nefnd skipuð til þess að kanna kaup Magma á HS Orku

Forsætisráðherra hefur skipað nefnd sem skal meta lögmæti kaupa fyrirtækisins Magma Energy á eignarhlutum í HS Orku og starfsumhverfi orkugeirans hér á landi. Nefndina skipa: Hjördís Hákonardóttir, fyrrv. hæstaréttardómari, sem er formaður, Bjarnveig Eiríksdóttir, hdl og LL.M í Evrópurétti og alþjóðaviðskiptarétti, Sveinn Margeirsson, dr. í iðnaðarverkfræði, Ólafur Páll Jónsson, dósent í heimspeki við Háskóla Íslands og Aagot Óskarsdóttir, lögfræðingur. Nefndinni til ráðgjafar verður Trausti Fannar Valsson, lektor í stjórnsýslurétti við Háskóla Íslands, og nefndin mun jafnframt leita til fleiri sérfræðinga við vinnslu afmarkaðra þátta.

Vinnu nefndarinnar verður hagað með eftirfarandi hætti:

Nefndin mun vinna sjálfstæða úttekt á kaupum Magma Energy á eignarhlutum í HS Orku í gegnum dótturfélag í Svíþjóð og meta lögmæti þeirra.

Nefndin skal gefa rökstutt álit á því hvort kaup Magma Energy á eignarhlut í orkufyrirtækinu HS Orku í gegnum dótturfélag í Svíþjóð séu samrýmanleg íslenskum lögum og reglum EES-samningsins.

Nefndin skal meta hvort máli skipti í því samhengi hvort hið sænska dótturfélag hafi með höndum eiginlega starfsemi, hvort kaupandi sé kanadískur eða sænskur og hvaða hlutverki hið kanadíska móðurfélag gegnir í því að annast eða ábyrgjast greiðslur vegna viðskiptanna og í starfsemi og umsvifum félagsins hér á landi.

Jafnframt skal nefndin kanna til hlítar hvort kaup Magma Energy á HS Orku standist meginreglur og markmið íslenskra laga um auðlindir og orkunýtingu og sérstaklega skal meta ákvæði EES-samningsins hvað ofangreinda þætti varðar.

Nefndin skal, á grundvelli þess sem að ofan segir, láta í ljós álit sitt á því hvort forsendur kunni að vera fyrir stjórnvöld til að leita leiða til að grípa inn í umrædd viðskipti Magma Energy með hlut í HS Orku.(ruv.is)

 

Björgvin Guðmundsson

 

Athugasemdir

[Guðjón Sigþór Jensson, 3.8.2010 kl. 17:58]

Vonandi lýkur þessari Magma martröð sem fyrst. Ýmsar eignir Atorku voru kjaftaðar niður á sínum tíma, Prómens átti að vera einskis virði en var metið á rúmlega 11 miljarða fyrir nokkru. Geysir Green verður væntanlega aftur í eigu Íslendinga en aðaleigandi þess var Atorka. Hvernig verður með réttarstöðu þeirra fjölmörgu hlutafjáreigenda og lífeyrissjóða sem áttu stóra hluti í Atorku? Samþykkt var á umdeildum hlutafjárfundi að afskrifa allt hlutafé og afhenda fyrirtækið kröfuhöfum.

Ljóst er að þessi rannsóknarnefnd mun hafa nóg á sinni könnu. Umfram allt þarf að koma fram hvaða aðilar höfðu hagsmuni af að hafa verðmæti af smáhluthöfunum og lífeyrissjóðunum.

Mosi