Aðild að ESB: Ísland haldi fullum yfirráðum yfir sjávarútvegsmálum sínum

Björgvin Guðmundsson skrifar grein í Morgunblaðið í dag um Evrópusambandið.Greinin heitir:Ísland á heima í samfélagi  Evrópu.Þar segir svo m.a.: 

Evrópusambandið (ESB) hefur samþykkt að hefja samningaviðræður við Ísland um  aðild þess að  ESB.Búast má við því, að viðræðurnar taki a.m.k. 2 ár.  Enda þótt Ísland sé aðili að  Evrópska efnahagssvæðinu (EES) og hafi samþykkt mikið af reglum og tilskipunum ESB má samt búast við löngum og ströngum samningaviðræðum.Aðild okkar að EES auðveldar samningaviðræður. En  reikna má með því að viðræður um sjávarútvegs-og landbúnaðarmál verði erfiðar.Við munum væntanlega óska  eftir eftir því, að  Ísland verði sjálfstætt fiskveiðistjórnunarsvæði og að Íslendingar fari með  full og  óskoruð yfirráð á því.Það þýðir,að  Íslendingar haldi fullum  yfirráðum yfir sjávarútvegsmálum sínum og þar á meðal úthlutun heimilda til veiða í íslenskri fiskveiðilögsögu.  Því er haldið fram,að Ísland hafi ekkert að óttast í þessu efni  við aðild að ESB. Reynslan hafi leitt í ljós,að strandveiðiríki haldi öllum sínum fiskveiðiréttindum við aðild að sambandinu þó fiskveiðiheimildum sé úthlutað í Brussel. Ég tel þó ekki óhætt að treysta á það og því nauðsynlegt að fá undanþágur.  Í landbúnaðarmálum þurfum við einnig að fá víðtækar undanþágur. Svíar og Finnar fengu miklar undanþágur fyrir sinn landbúnað,þegar þessar þjóðir gengu í ESB. Undanþágur fengust fyrir landbúnað þessara þjóða á þeim grundvelli,að um mjög norðlægan landbúnað væri að ræða hjá báðum þjóðunum.Við þurfum að fá svipaðar undanþágur fyrir okkar landbúnað enda okkar landbúnaður einnig á norðlægum slóðum.

En hvers vegna er Ísland að sækja um aðild að  ESB? Hvað færir slík  aðild okkur, sem við  fáum ekki  nú þegar vegna veru okkar í EES? Eins og fram er komið verður Ísland að taka yfir mikið af reglum  og tilskipunum ESB auk margvíslegra laga.En Ísland er ekkert með í því að semja lög ESB og lítið sem ekkert með í því að móta reglur og tilskipanir ESB.Ísland á ekki fulltrúa á þingi ESB og situr ekki við stjórnborð sambandsins. Ef Ísland gengur  í ESB verður hér breyting á. Ísland kemst þá að stjórnborði ESB og getur haft áhrif á  gerð laga,reglna og tilskipana ESB. Það er vissulega óeðlilegt,að Ísland skuli þurfa að taka við og lögfesta lög og tilskipanir ESB án þess að hafa nokkur áhrif á undirbúning þeirra.

Meðal Evrópuþjóða eru nokkrar  af okkar bestu viðskiptaþjóðum.EES er stærsta viðskiptasvæði okkar..Margt er einnig líkt með menningu okkar og menningu Evrópuþjóða. Við eigum því heima í samfélagi Evrópuþjóðanna.

Björgvin Guðmundsson

www.gudmundsson.net