BHM andvígt frekari framlögum í Framtakssjóð

Miðstjórn Bandalags háskólamanna leggst alfarið gegn frekari framlögum lífeyrissjóða félagsmanna sinna til Framtakssjóðs Íslands. Í ályktun miðstjórnar segir að af gefnu tilefni geri hún þá kröfu til Framtakssjóðs Íslands, að hann sýni með óyggjandi hætti fram á að fjárfestingar hans fylgi tilgangi og skilmálum sjóðsins.

Bandalag háskólamanna hafi við stofnun sjóðsins varað við þeirri stöðu, sem því gæti fylgt að sjóður á vegum launamanna kæmi með virkum hætti að ákvörðunum um, hvaða fyrirtæki héldu velli í gegnum núverandi þrengingar.

Verði sjóðurinn ekki við óskum BHM um gagnsæi, muni bandalagið fara þess á leit að lífeyrissjóðir, sem það á aðkomu að, endurskoði aðkomu sína að sjóðnum.(visir.is)

Víst er full ástæða til þess að fara varlega í ráðstöfun á fjármagni lífeyrissjóðanna.En á hinn bóginn er á það að líta að lífeyrissjóðirnir geta aðstoðað við efnahagslega uppbyggingu í landinu eftir hrunið.

 

Björgvin Guðmundsson