Aflaverðmæti fiskiskipa 57 milljarðar fyrstu 5 mánuðina í ár

Aflaverðmæti íslenskra skipa nam rúmum 57 milljörðum króna á fyrstu fimm mánuðum ársins 2010 samanborið við 43,1 milljarð á sama tímabili 2009. Aflaverðmæti hefur því aukist um tæpa 14 milljarða eða 32,4% á milli ára.

Aflaverðmæti botnfisks var í lok maí orðið 43,7 milljarðar og jókst um 29,5% frá sama tíma í fyrra þegar aflaverðmætið nam 33,8 milljörðum. Verðmæti þorskafla var um 22,2 milljarðar og jókst um 31,5% frá fyrra ári. Aflaverðmæti ýsu nam 7,6 milljörðum og jókst um 11,8%, en verðmæti karfaaflans nam um 5,8 milljörðum, sem er 24,2% aukning frá árinu 2009. Verðmæti ufsaaflans jókst um 31% milli ára og nam rúmum 2,7 milljarði fyrstu fimm mánuði ársins.

Verðmæti flatfiskafla nam rúmum 4,1 milljarði króna í janúar til maí 2010, sem er 9,7% aukning frá fyrra ári. Aflaverðmæti uppsjávarafla jókst um 67,4% milli ára og nam rúmum 8,5 milljörðum.
 
Verðmæti afla sem seldur er í beinni sölu útgerða til vinnslu innanlands nam 24,5 milljörðum króna og jókst um 40,4% frá árinu 2009. Aflaverðmæti sjófrystingar var tæpir 18 milljarðar, sem er 47,1% aukning milli ára. Verðmæti afla sem keyptur er á markaði til vinnslu innanlands jókst um 47,5% milli ára og var um 9,5 milljarðar. (Hagstofan)

 

Björgvin Guðmundsson