Geir H.Haarde: Röng niðurstaða þingmannanefndar

Niðurstaða meirihluta þingmannanefndar, sem fjallað hefur um skýrslu rannsóknarnefndar Alþingis, um ákærur á hendur fyrrverandi ráðherrum, veldur mér miklum vonbrigðum. Ég tel að meirihlutinn hafi komist að rangri niðurstöðu," segir Geir H. Haarde, fyrrverandi forsætisráðherra og formaður Sjálfstæðisflokksins, í yfirlýsingu sem hann sendi fjölmiðlum skömmu fyrir klukkan 12.

„Komi til þess að Alþingi samþykkti tillögu um að stefna mér fyrir landsdóm verður það þungbær reynsla en sá sem hefur hreinan skjöld er ekki hræddur við að fá úrlausn sinna mála fyrir óháðum og óvilhöllum dómstóli eins og landsdómi er ætlað að vera," segir Geir.

Meirihluta þingmennanefndar sem fjallaði um skýrslu rannsóknarnefndar Alþingis leggur til að fjórir ráðherrar í ríkisstjórn Sjálfstæðisflokks og Samfylkingar verði dregnir fyrir landsdóm, þar á meðal Geir.

Geir segir að þeir þingmenn sem samþykkja ákæruna verði að vera reiðubúnir að horfast í augu við sína ábyrgð á því þegar öll kurl verða komin til grafar (visir.is)

Erfitt er að setjast í dómarasæti í þessu máli.Ég tel,að meginorsök bankahrunsins sé einkavæðing bankanna.Ranglega hafi verið staðið að henni og ég er sannfærður um það,að ef ríkisbankarnir hefðu ekki verið einkavæddir þá hefði ekkert hrun orðið hér. Ríkisbankarnir hefðu ekki skuldsett sig eins og einkabankarnir og ekki farið í það brask sem einkabankarnir gerðu. Hins vegar tel ég að ríkisstjórn  Geirs H.Haarde hefði átt að sjá til þess að Fjármálaeftirlit og Seðlabanki gegndu eftirlitshlutverki sínu.

 

Björgvin Guðmundsson