Atvinnuleysið komið niður í 7,3%

Skráð atvinnuleysi minnkaði um 3,8% í ágúst miðað við fyrri mánuð, eða um 473 manns að meðaltali, samkvæmt tölum Vinnumálastofnunar.

Atvinnuleysið var 7,3% í ágúst en þá voru að meðaltali 12.096 atvinnulausir. Körlum á atvinnuleysisskrá fækkaði um 277 eða um 4% að meðaltali en konum fækkaði um 196 að meðaltali eða um 3,5%.

Mest fækkaði atvinnulausum hlutfallslega á Suðurlandi og Suðurnesjum. Atvinnuleysið var 8,3% á höfuðborgarsvæðinu en 5,5% á landsbyggðinni. Mest var atvinnuleysið á Suðurnesjum, eða 11% en minnst á Norðurlandi vestra, eða 2,4%. Atvinnuleysið var 7,3% meðal karla og 7,4% meðal kvenna.
(visir.is)

Það er ánægjulegt,að atvinnuleysið skuli hafa minnkað mikið í ágúst en ei að síður eru enn 12 þús. manns atvinnulausir. Það er hörmulegt og það verður að gera róttækar ráðstafanir til þess að eyða því.

 

Björgvin Guðmundsson