Atkvæðagreiðsla um ákærur á morgun eða hinn

Atkvæðagreiðsla um hvort höfða beri mál gegn þremur eða fjórum fyrrum ráðherrum úr ríkisstjórn Geirs Haarde fer fram á Alþingi á morgun eða í síðasta lagi á miðvikudag.

Atli Gíslason, formaður þingmannanefndarinnar, fullyrti í síðustu viku að ef Alþingi gæti ekki klárað málin sem þingmannanefndin fjallaði um þyrfti að rjúfa þing og boða til kosninga. Nú hefur þingið ákveðið að klára málið og verður atkvæðagreiðsla nú í vikunni. Skýrslan og tillögurnar hafa verið ræddar á Alþingi í allan dag. Þingmenn deila enn um lögfræði og lög um landsdóm. Formaður nefndarinnar leggur til að breytingatillögur við skýrsluna verði teknar fyrir á næsta þingi og ítrekar að í þessu máli sé heiður Alþingis í húfi. Formaður Sjálfstæðisflokksins segir hið pólitíska uppgjör á hruninu sé hér gert að sakamáli og enginn þori að taka umræðuna. Því vísar formaður nefndarinnar á bug. Eftir stendur að sjö af níu fulltrúum í þingmannanefnd vilja höfða mál gegn ráðherrum en tveir vilja það ekki. Endanleg niðurstaða bíður atkvæðagreiðslunnar.(ruv.is)

 

Björgvin Guðmundsson