500 vilja á stjórnlagaþing

Ástráður Haraldsson, formaður yfirkjörstjórnar, telur að um 500 manns hafi skilað inn framboðum til Stjórnlagaþings, en frestur til þess rann út á hádegi í dag. Yfirkjörstjórn kom saman til fundar kl. 12.15 í hádeginu til að fara yfir framboðin. Tölvukerfi landskjörstjórnar hrundi vegna álags í morgun.

Ástráður segir að nákvæm tala liggi fyrir síðar en fjöldamörg framboð hafi borist í morgun áður en framboðsfresturinn rann út. Allmörg framboð hafi borist fyrir helgi en síðan hafi allar gáttir brostið í morgun og framboðin flætt inn til kjörstjórnar. Honum sýnist að þau séu eitthvað í námunda við 500.

Tölvukerfi landskjörstjórnar hrundi í morgun. Ástráður segir að í skamman tíma hafi vefsíðan vegna stjórnlagaþings ekki ráðið við aukið álag. Því hafi önnur leið verið farin og fólk sent erindi í gegnum tölvupóst. Síðan hafi vefsíðan komist í lag. Ástráður segir að það hafi komið á óvart hve ásóknin hafi verið mikil og aukist á svo skömmum tíma.

Ástráður segir að fjöldi frambjóðenda hafi ekki áhrif á hvernig kjörseðill í kosningum til Stjórnlagaþingsins líti út því lögum hafi verið breytt með hliðsjón af því að fjöldamargir gætu boðið sig fram. Þetta hafi hins vegar einhver áhrif á úrvinnslu og kynningarstarf fyrir kosningarnar.(ruv.is)

Það er jákvætt að þetta margir skuli hafa boðið sig fram. Það leiðir í ljós,að mikill áhugi er á stjórnlagaþinginu og það er gott.

 

Björgvin Guðmundsson