Miklar gjaldskrárhækkanir um áramótin

Árið 2011 gæti reynst mörgum dýrara en árið sem var að líða. Fjölmargar gjaldskrárhækkanir tóku gildi um áramót. Fólk sem fréttastofa RÚV ræddi við í dag var flest sammála um að þessar hækkanir hefðu töluverð áhrif á heimilisbókhaldið.

Þeir sem ætluðu að taka strætó í vinnu eða skóla á höfuðborgarsvæðinu í morgun ráku sig á það að gjaldið fyrir staka ferð hefur hækkað úr 280 krónum í 350 krónur. Og þetta er ekki það eina sem er dýrara nú en fyrir áramót. Nú kostar meira í sund í Reykjavík en áður, skólamáltíðir í grunnskólum borgarinnar hafa hækkað um tíu prósent og gjaldskrár frístundaheimilanna um 20 prósent. Þá hafa leikskólagjöld hækkað í mörgum sveitarfélögum sem og útsvar.

Greiðsluþátttaka sjúklinga vegna heilbrigðisþjónustu hækkaði að jafnaði um 2,9% um áramót og hlutur sjúklinga í lyfjakostnaði hækkaði einnig. Tóbak hækkaði um þrjú prósent og léttvín og bjór um fjögur. Þá hafa vörugjöld á fjölmargar bifreiðar hækkað. Bensínið hækkaði líka um áramótin. Allt þetta hefur áhrif á heimilisbókhald landsmanna.(ruv.is)

Björgvin Guðmundsson