Stefnunni um aðildarviðræður við ESB verður ekki breytt

Á morgun verður fundur í þingflokki VG og má þá búast við að rætt verði um þau ágreiningsmál,er upp komu hjá VG,þegar fjárlög voru afgreidd en 3 þingmenn VG samþykktu ekki fjárlögin,heldur sátu hjá.Það liggur í loftinu,að ekki verði mikið rætt um þetta ágreiningsefni á fundinum heldur  ýmis önnur svo sem ESB og sameiningu 3ja atvinnumálaráðuneyta í eitt nýtt atvinnuvegaráðuneyti.Um þessi mál er einnig mikill ágreiningur.Af nógu er að taka.Sagt er,að VG vilji breytingar á stefnunni varðandi samningaviðræður við ESB.En ekki er að búast við,að það takist.Alþingi samþykkti að sækja um aðild að ESB og að hefja samningaviðræður.Sú samþykkt stendur og verður ekki breytt nema með nýrri samþykkt alþingis.Málið er nú í höndum utanríkisráðherra,samninganefndar og utanríkismálanefndar alþingis.Áróður vissra þingmanna VG um að í gangi sé aðlögunarferli en ekki samningaferli stenst ekki.Vegna aðildar okkar að EES er alltaf í gangi viss aðlögun að ESB.En það hefur ekkert með umsóknarviðræður okkar að gera.Það verður engin frekari aðlögun fyrr en og ef Ísland samþykkir aðild að ESB  í þjóðaratkvæðagreiðslu.Þingmenn VG geta því verið rólegir.Nauðsynlegt er hins vegar að hafa í gangi sem mesta kynningu á ESB vegna aðildarviðræðnanna og væntanlegrar þjóðaratkvæðagreiðslu.Mér finnst sjálfsagt að þiggja fjárstyrk frá ESB til kynningarstarfs.

Ákvæði er í stjórnarsáttmála um nýtt atvinnuvegaráðuneyti.Undan því verður ekki vikist.

 

Björgvin Guðmundsson