Fáir eldri borgarar fá verðbætur (hungurlús)

Björgvin Guðmundsson skrifar grein um málefni aldraðra  í Morgunblaðið í dag. Þar segir svo m.a.:

Um sl. áramót kom til framkvæmda að greiða 2,3% verðbætur á vissan lífeyri

aldraðra og öryrkja. Hér er miðað við áætlaða verðbólgu yfirstandandi

árs.Vísitala neysluverðs hefur hækkað um  6,1% frá ársbyrjun 2009 og

láglaunafólk hefur fengið 16% kauphækkun á þessu tímabili.Á sama tíma hefur lífeyrir aldraðra ekki hækkað um eina krónu.Það hefði því átt að hækka

lífeyri aldraðra og öryrkja um 6,1-16 %. En það var ekki gert heldur valin

sú lægsta viðmiðunartala,sem unnt var að  finna. Ekki getur þetta talist

stórmannlegt hjá ríkisstjórninni.

Það má vissulega gagnrýna það, að ekki eigi að hækka vissan lífeyri um meira

en 2,3%. En það er ekki síður gagnrýnisvert,að  það er aðeins lítill hópur

eldri borgara, sem  fær umræddar verðbætur. Verðbæturnar koma aðeins á

lágmarksframfærsluviðmið TR hið meira og hið minna.Þeir, sem búa einir og hafa engar tekjur aðrar en lífeyri frá almannatryggingum, 400 manns, fá

lágmarksframfærsluviðmið hið meira.Þeir fá  4000 kr. hækkun á mánuði.En

hinir sem búa með öðrum  og hafa aðeins tekjur frá TR, 1200 talsins,  fá

lágmarksframfærsluviðmið hið minna.Þeir fá 3500 kr. hækkun.Flestir aðrir eldri

borgarar fá enga hækkun eða litla hækkun ( hluta verðbóta). Ellilífeyrisþegar eru 25000 talsins.  Yfir 20000 eldri borgarar fá engar verðbætur á sinn lífeyri. Í hópi þessara  eldri

borgara eru mjög margir, sem búa við erfið kjör og eiga erfitt með að

framfleyta sér. Þeir, sem hafa lágan lífeyri úr lífeyrissjóði, eru ekki betur

settir en hinir, sem hafa ekkert úr lífeyrissjóði.Þeir eiga því jafnmikinn

rétt á verðbótum og þeir sem ekkert fá úr lífeyrissjóði. Tökum dæmi af

eldri borgara,sem hefur 50 þús.kr.  úr lífeyrissjóði á mánuði. Hans lífeyrir

frá almannatryggingum er skertur um nákvæmlega sömu upphæð og hann fær frá lífeyrirssjóði.Lífeyrir hans frá TR lækkar úr 184 þús. kr. á mánuði  fyrir

skatt í 134 þús. kr. á mánuði fyrir skatt.Hann er ekki betur settur en  

 en hinn sem aldrei hefur greitt neitt í lífeyrissjóð. Ég

lít á þetta sem hreina eignaupptöku.Sennilega er þetta brot á stjórnarskránni.

Björgvin Guðmundsson

www.gudmundsson.net