Skólagarðarnir lagðir niður

Skólagarðar Reykjavíkur verða ekki starfræktir í sumar eins og undanfarna áratugi. Ellý Katrín Guðmundsdóttir, sviðsstjóri umhverfis- og samgöngusviðs borgarinnar, segir að vegna sparnaðar hafi þurft að skera niður kostnað sviðsins um 8 prósent.

 Í staðinn fyrir skólagarðana verður fjölskyldum boðið að leigja sér svæði eða reit til að rækta matjurtir. 600 matjurtagarðar verða leigðir almenningi þar sem skólagarðarnir voru áður. Leigugjald verður 4.200 krónur fyrir 20 fermetra. Plöntur og útsæði fylgja ekki eins og var í skólagörðunum. Í fyrra kostaði 4000 krónur í skólagarðana. Borgin leigir áfram út matjurtagarða í Skammadal í Mosfellsbæ. Þeir eru mun stærri en skólagarðarnir. Leigan verður svipuð og á litlu görðunum en um lengri veg að fara.

Á vef Reykjavíkurborgar kemur fram að skólagarðar Reykjavíkur hófu starfsemi sína árið 1948. Markmiðið með starfsemi skólagarðanna var að fræða börn á aldrinum 8-12 ára um ræktun og umhirðu matjurta. Auk þess var það ætíð á dagskránni að fara fræðslu- og skemmtiferðir reglulega yfir sumarið.  Aðsókn í garðana var oft svo mikil að færri komust að en vildu.(ruv.is)

Það er miikill skaði að því að skólagarðarnir skuli lagðir niður. Það var mikið uppeldislegt atriði að gefa skólabörnum kost á því að rækta matjurtir í skólagörðum.Það dregur úr tjóninu,að foreldrum verði gefinn kostur á að leigja skika á svæðinu þar sem skólagarðarnir voru en það er ekki víst,að nærri allir foreldrar hafi efni á því eins og ástandið er í dag varðandi atvinnu og lífskjör.

 

Björgvin Guðmundsson