Jóhanna boðar aðgerðir,sem skapa eigi 2200 ársverk

Jóhanna Sigurðardóttir forsætisráðherra boðar aðgerðir stjórnvalda sem skapa eiga að minnsta kosti 2200 ársverk . Hún bindur miklar vonir við að þannig megi minnka atvinnuleysi og ná upp hagvexti. Ráðherra segir að bölsýni stjórnarandstöðunnar sé hér allt að drepa.

Ólöf Nordal varaformaður Sjálfstæðisflokksins ræddi stöðu atvinnumála við forsætisráðherra á Alþingi í dag. Hún gagnrýndi atvinnu- og skattastefnu ríkisstjórnarinnar og sagði skattpíningu hennar bitna á venjulegu fólki.

Jóhanna Sigurðardóttir sagði tvo stóra áhættuþætti steðja að samfélaginu en það væru kjarasamningar og Icesave samningar. En hún boðaði aðgerðir: Ef litið væri til þeirra framkvæmda sem væru í undirbúningi og ef sátt næðist  um framkvæmd þeirra, svo sem í vegamálum, þá yrðu hér fljótlega sköpuð 2200-2300 ársverk og 500-600 bein varanleg störf við framtíðarrekstur, sagði ráðherra. Um væri að ræða aukna afkastagetu álversins í Straumsvík, framkvæmdir við Búðarhálsvirkjun, byggingu kísilmálmverksmiðju í Helguvík, hreinkísilverksmiðju í Grindavík og natríumklóratverksmiðju á Grundartanga.

Forsætisráðherra sagði einnig að vel kæmi til greina að skoða skattabreytingar á fyrirtæki og þá atvinnutryggingagjaldið og hugsanlega skatta á ofurlaun. Nú þyrfti hins vegar bjartsýni en ekki bölsýni stjórnarandstöðunnar sem væri hér allt að drepa.(ruv.is)

 

Þetta eru góðar fréttir,sem forsætisráðherra flytur hér og vonandi gengur það eftir,að 2200 ársverk verðu sköpuð.Það er ýmislegt í gangi og annað í pípunum en enn þarf að spýta i lófana.

 

Björgvin Guðmundsson