Hernaðaraðgerðir bandamanna í Líbíu óhjákvæmilegar

Hundruðum flugskeyta hefur í kvöld verið skotið á valin skotmörk í Líbíu af herliði Bandaríkjamanna, Breta og Frakka. Aðgerðirnar eru með það að markmiði að framfylgja flugbanni yfir landinu sem samþykkt var í öryggisráði Sameinuðu Þjóðanna en fyrr í dag bárust af því fregnir að herlið einræðisherrans Gaddafís hefði gert árás á vígi uppreisnarmanna í borginni Benghazi, þrátt fyrir að hafa lýst yfir vopnahléi í gær.

Þá hafa sprengjuflugvélar vesturveldanna einnig varpað sprengjum á skotmörk í höfuðborginni Trípólí að því er fram kemur á fréttastöðinni AFP. Breska varnamálaráðuneytið hefur einnig gefið út að flugskeytum hafi verið skotið frá kafbáti breska flotans. Líbíska ríkissjónvarpið segir að hersveitir "krossfara" hafi gert árásir á óbreytta borgara í Trípólí auk þess sem olíubirgðastöðvar hafi verið eyðilagðar.

Heimildir BBC, breska ríkisútvarpsins, herma hinsvegar að árásir hafi verið gerðar á hernaðarlega mikilvæg skotmörk og herstöðvar. Aðgerðirnar hófust aðeins nokkrum klukkutímum eftir að leiðtogafundi vesturveldanna og nokkurra arabaríkja lauk í París í Frakklandi. Þar var ákveðið hvernig framfylgja ætti ályktun öryggisráðsins, en hún gerir ráð fyrir að öllum nauðsynlegum ráðum megi beita til þess að verja almenning í landinu fyrir hersveitum Gaddafís.(visir.is)

Hernaðaraðgerðir bandamanna í Libíu voru óhjákvæmilegar. Her Gaddafi var beitt gegn almenningi í landinu til þess að bæla niður friðsamleg mómæli.Öryggisráð Sþ. ákvað á löglegan hátt að setja loftbann á Líbíu og hernaðaraðgerðir bandamanna eru til þess að framfylgja því.

 

Björgvin Guðmundsson