Fjármálaráðherra: Háskólamenntaðir starfsmenn stjórnarráðs fá leiðréttingu launa

Niðurstöður samanburðar á launum háskólamenntaðra starfsmanna stjórnarráðsins og sambærilegra hópa benda til að laun háskólamenntaðra starfsmanna stjórnarráðsins hafi dregist aftur úr. Fjármálaráðherra segir að laun þeirra verði leiðrétt fyrir lok ársins.

Árið 2009 voru lækkuð laun fjölmargra starfsmanna ríkisins og stofnana. Þegar gerðir voru samningar við opinbera starfsmenn í kjölfar kjarasamninga á almennum vinnumarkaði í sumar krafðist félag háskólamenntaðra starfsmanna sjórnarráðsins að launalækkanir sem starfsmenn sættu í árslok 2009 yrðu látnar ganga til baka. 

Gert var samkomulag milli félagsins og  fjármálaráðherra fyrir hönd ríkissjóðs um að endurmeta launalækkunina.  Fjármálaráðuneytið lét gera launagreiningu sem ennþá er verið að vinna úr en fyrstu niðurstöður benda til að munur sé á milli starfsmanna ráðuneytanna og kjara hjá öðrum sambærilegum félögum. Steingrímur segir að laun þeirra verði leiðrétt í samræmi við niðurstöðurnar.

Hanna Dóra Másdóttir formaður félags háskólamenntaðra starfsmanna stjórnarráðsins segir að félaginu hafi ekki formlega verið kynntar niðurstöðurnar og ennþá sé óljóst hvernig útfærslan verði á launaleiðréttingunni.   Steingrímur segir að þessi aðgerð hafi ekki fordæmisgildi.

„Þetta snýr bara að því að tryggja að þessi tiltekni hópur dragist ekki aftur úr öðrum sambærilegum og hefur ekkert fordæmisgildi nema gagnvart því. Það var samþykkt að skoða mál þessa hóps til að hann sæti ekki eftir með ósanngjörnum hætti,“ segir fjármálaráðherra. (ruv.is)

 

Björgvin Guðmundsson