Verður máli Geirs H.Haarde vísað frá Landsdómi?

Landsdómur ákveður á næstu fjórum vikum hvort málarekstri gegn Geir H. Haarde verði vísað frá dómi eður ei. Geir segist hafa hreina samvisku og kveðst bíða rólegur eftir niðurstöðu.

Landsdómur kom saman morgun til að fjalla um kröfu verjanda Geirs H. Haarde um að máli gegn honum verði vísað frá. Andri Árnason, verjandi Geirs, flutti kröfu þeirra um að málinu yrði vísað frá. Þar var vísað í eitt og annað meðal annars það að rannsókn málsins væri verulegum annmörkum háð og hefði af hálfu saksóknara alþingis verið í andstöðu við meginreglur sakamálaréttarfars. Þeir telja ákæruatriðin óljós og að í ákæruna vanti rökstuðing fyrir því sem eiga að vera brot Geirs H. Haarde í starfi, jafnræðisregla stjórnarskrár væri brotin þar sem Geir H. Haarde væri aðeins einn ákærður en ekki aðrir ráðherrar. Þá var fjallað um meint vanhæfi kjörins saksóknara, Sigríðar J. Friðjónsdóttur.

Sigríður varðist þessari frávísunarkröfu og vísaði í gildandi lög um landsdóm og ráðherraábyrgð. Hún sagði af og frá að þarna væru ástæður til að vísa málinu frá. Landsómur hefur nú fjórar vikur til að meta hvort ástæða sé til frávísunar.

Geir H. Haarde sagði í viðtali við fréttastofu RÚV að það væri þungbær reynsla að sitja svo lengi á sakamannabekknum vitandi það sem hann vissi um tilurð málsins. „Þetta er ekkert venjulegt sakamál eða glæpamál sem þó er höfðað í slíkum búningi,“ sagði Geir og bendi á að engin venjuleg sakamálarannsókn hefði farið fram í þessu máli.

„Það er enginn innbrotsþjófur svo ómerkilegur að hann sé að minnsta kosti spurður að því hvað honum finnist um þær sakir sem eru bornar á hann. Það hefur ekki verið gert í þessu máli sem er auðvitað lágmarks krafa,“ sagði Geir. Hann sagði samvisku sína hreina og kvaðst bíða rólegur eftir niðurstöðu. Málið snúist fyrst og fremst um pólitík.
„Það er verið að reyna að koma höggi á fyrrverandi forsætisráðherra og flokkinn hans. Það er það sem vakir fyrir ákærendum sem eru ekki þessi saksóknari heldur meirihlutinn á Alþingi sem þessu réði. Í raun ætti ekki Sigríður að standa hér sem saksóknari Alþingis heldur Steingrímur J. Sigfússon, Atli Gíslason og Ögmundur Jónasson. Kannski allir þrír saman,“ sagði Geir.(ruv.is)

Ég tel,að vísa eigi máli Geirs.H.Haarde frá dómi.Það eru miklir gallar á málatilbúnaði,m.a. fór engin rannsókn fram áður en alþingi ákvað að ákæra Geir.Verjandi Geirs nefnir mörg önnur atriði sem rök fyrir frávísun.

 

Björgvin Guðmundsson