Nýtt þing leiðréttir kjör aldraðra og öryrkja

Björgvin Guðmundsson skrifar grein í Morgunblaðið í dag. Þar segir svo:

Í aðdraganda þingkosninganna  hefur verið talsvert fjallað um kjör aldraðra.En það hefur lítið verið fjallað um málefni aldraðra á alþingi.Gamla þingið hafði t.d. ekki dug í sér til þess að leiðrétta kjör aldraðra og öryrkja áður en þingi var frestað. En margir frambjóðendur í þingkosningunum tóku þetta málefni fyrir og lýstu því ákveðið yfir að bæta þyrfti kjör aldraðra og öryrkja.Í umræðuþætti í sjónvarpi fyrir kosningar voru allir frambjóðendur spurðir, hvort þeir vildu afturkalla kjaraskerðingu aldraðra og öryrkja frá 2009. Nær allir frambjóðendurnir svöruðu því játandi. Samþykkt var á landsfundum Sjálfstæðisflokks og Framsóknar að afturkalla ætti kjaraskerðinguna frá 2009.

Meirihluti fyrir kjarabótum aldraðra og öryrkja

Miðað við yfirlýsingar frambjóðenda í þingkosningunum ætti að vera öruggur meirihluti á nýju þingi fyrir afturköllun kjaraskerðingar aldraðra og öryrkja frá 2009 og verulegum kjarabótum þeim til handa.Það stenst ekki að ætla að afgreiða það mál eingöngu með lögfestingu nýs frumvarps um almannatryggingar.Bæði kjaramálanefnd Landssambands eldri borgara (LEB) og kjaranefnd Félags eldri borgara(FEB) telja að afturkalla verði kjaraskerðinguna frá 2009 enda þótt sett verði ný lög um almannatryggingar.Slík lög komi ekki í stað afturköllunar umræddrar kjaraskerðingar.Kjaraskerðingin frá 2009 hefur kostað aldraða og öryrkja 17 milljarða kr. Ef frumvarpið um almannatryggingar verður lögfest, færir það lífeyrisþegum aðeins 2 milljarða netto í ávinning fyrstu 3 árin eftir gildistöku.Næsta árið þar á eftir bætast aðeins við rúmir 3 milljarðar netto í ávinning. Þessar tölur leiða í ljós, að ávinningur af nýjum lögum um almannatryggingar bætir ekki lífeyrisþegum að fullu skaðann af lögunum frá 2009. Þar vantar mikið á.Og þá er einnig eftir að bæta lífeyrisþegum tjónið af kjaragliðnuninni sl. 4 ár. Það skortir mikið á, að umrædd breyting á almannatryggingum muni bæta það mikla tjón, sem lífeyrisþegar hafa orðið fyrir sl. 4 ár.Breytingarnar á tryggingunum taka mörg ár. En auk þess ná breytingarnar á almannatryggingunum ekki til allra.Þær taka fyrst og fremst til þeirra,sem hafa miklar tekjutengingar.

Erfitt er að spá fyrir um næstu ríkisstjórn. Allt bendir til þess,að stjórnarandstaðan taki við.Samfylking og VG hafa átt erfitt uppdráttar í kosningabaráttunni. Kjósendur telja ekki ríkisstjórnina hafa staðið sig nógu vel við upphreinsun eftir að Sjálfstæðisflokkurinn olli hér bankahruni með aðstoð Framsóknar.Miðað við stöðu Samfylkingar og VG er óvíst, að þessir flokkar verði í ríkisstjórn.Ég tel víst, að ný ríkisstjórn og nýtt alþingi muni bæta kjör aldraðra og öryrkja.Stjórnarandstaðan hefur tekið mjög jákvæða afstöðu til baráttumála lífeyrisþega.Kjarabætur lífeyrisþega ættu því að ná fram að ganga, ef þessir flokkar verða í ríkisstjórn. Það kemur í hlut nýs þings og nýrrar stjórnar að afturkalla kjaraskerðinguna frá 1.júlí 2009 strax og að leiðrétta kjör aldraðra og öryrkja vegna kjaragliðnunar sl. 4 ár.

Björgvin Guðmundsson