Stöðva verður skerðingu lífeyris aldraðra hjá almannatryggingum strax.Þetta er líkast eignaupptöku

 

 

  U

Björgvin Guðmundsson skrifar grein í DV sl. Þriðjudag  um skerðingar stjórnvalda á lífeyri aldraðra og öryrkja hjá TR.Þar segir svo

 

 

 

Þegar lífeyrissjóðirnir voru stofnaðir, var gert ráð fyrir því, að þeir yrðu viðbót við almannatryggingar.Launþegar samþykktu að greiða ákveðið hlutfall launa sinna í lífeyrissjóð gegn ákveðnu mótframlagi  atvinnurekenda.Síðan áttu launþegar að fá  lífeyrinn úr lífeyrissjóðnum greiddan að fullu, þegar þeir færu á eftirlaun.Þá áttu þeir að fá greiddan þennan viðbótarlífeyri ásamt lífeyri almannatrygginga. Gerist þetta ekki svona? Nei ekki aldeilis. Launþegi, sem hefur 70 þús. kr. á mánuði í lífeyri úr lífeyrissjóði, fær engan lífeyri úr almannatryggingum.Ríkisvaldið dregur af þessum eftirlaunamanni nákvæmlega jafnháa upphæð hjá Tryggingastofnun ríkisins eins og nemur lífeyri hans frá lífeyrissjóði. Launþeginn, sem samviskusamlega hefur greitt í lífeyrirsjóð alla sína starfsævi, fær því ekkert hærri lífeyri alls frá almannatryggingum og lífeyrissjóði en sá, sem aldrei hefur greitt eina krónu í lífeyrissjóð. Það er líkast því sem lífeyrir þessa manns í lífeyrissjóðnum hafi verið gerður upptækur! Menn spyrja: Er þetta löglegt.Er þetta ekki eignaupptaka? Ég hallast að því, að svo sé

 

Lífeyrissjóðskerfið gæti sprungið!

 

Það verður að stöðva þessa “ eignaupptöku” þegar í stað.Ríkisvaldið verður strax að stöðva það, að Tryggingastofnun ríkisins geti skert lífeyri þeirra eldri borgara, sem fá lífeyri úr lífeyrissjóði .Gerist það ekki, verður uppreisn gegn lífeyrissjóðakerfinu. Það er svo mikil óánægja í dag með þessar skerðingar, að það er rétt með naumindum að launþegar fást til þess að greiða iðgjöldin í lífeyrissjóðina .Launþegum finnst eins og það sé verið að blekkja þá, það sé verið að plata þá. Inn í þessa óánægju blandast óánægjan með stjórnarfyrirkomulag lífeyrissjóðanna. Sjóðfélagarnir sjálfir kjósa ekki stjórnarmenn lífeyrissjóða beinni kosningu heldur eru það  ASÍ og SA, sem kjósa stjórnarmenn lífeyrissjóðanna. Þessu verður að breyta. Sjóðfélagar eiga sjálfir að kjósa stjórnarmennina, alla eða flesta. Ég er ekki viss um, að  forusta aðila vinnumarkaðarins geri sér ljóst hvað mikil óánægja er í dag með lífeyrissjóðskerfið. Mitt mat er það, að ef ekki verður strax brugðist við og skerðingar tryggingabóta vegna greiðslna úr lífeyrissjóði stöðvaðar, geti lífeyrissjóðskerfið hæglega sprungið.

Kjaranefnd Félags eldri borgara í Reykjavík ályktaði um mál þetta 13.des.sl.Þar sagði svo:

Jafnframt fer kjaranefndin fram á það, að  ríkisstjórnin stöðvi þegar í stað skerðingu lífeyris aldraðra frá almannatryggingum vegna greiðslna úr  lífeyrissjóði. Þessi skerðing er svo mikil í dag, að hún eyðir með öllu ávinningi  margra ellilífeyrisþega af því að hafa greitt  í lífeyrissjóð. Í þessu sambandi vísar kjaranefndin í ályktun  aðalfundar FEB  í Reykjavík á þessu ári um þetta efni.

Það er einnig krafa eldri borgara, að hætt verði að skerða lífeyri aldraðra frá almannatryggingum vegna atvinnutekna. Landsfundur LEB á þessu ári ályktaði, að atvinnutekjur 67 ára og eldri ættu ekki að skerða lífeyrisgreiðslur frá Tryggingastofnun.Það á ekki að refsa eldri borgurum fyrir að vinna.

 

 

Loforðin við lífeyrisþega verði  efnd

 

Í aðdraganda þingkosninganna sl. vor gáfu núverandi  stjórnarflokkar öldruðum og öryrkjum mjög ákveðin kosningaloforð. Stærsta kosningaloforðið var, að kjaragliðnunin, sem varð sl. 4 ár, skyldi leiðrétt strax. Með kjaragliðnun er átt við það, að kaup láglaunafólks hækkar mun meira en lífeyrir aldraðra og öryrkja. Lögum samkvæmt á lífeyrir að hækka í samræmi við hækkun lægstu launa og í samræmi við hækkun neysluverðs.En skorið var á þessi tengsl í kreppunni og lífeyrir aldraðra og öryrkja frystur. Til þess að leiðrétta þessa kjaragliðnun þarf að hækka lífeyrinn um 20% strax. Framsóknarflokkurinn og Sjálfstæðisflokkurinn lofuðu  fyrir kosningar að framkvæma þessa leiðréttingu. Það var ekki aðeins, að frambjóðendur flokkanna gæfu þessi loforð heldur var það einnig samþykkt á flokksþingum beggja flokkanna fyrir kosningar, að umrædd  kjaragliðnun yrði leiðrétt strax og þessir flokkar kæmu til valda.Aldraðir og öryrkjar geta ekki beðið.Þeir þurfa að fá leiðréttingu strax.

 

Björgvin Guðmundsson

 

www.gudmundsson.net 

 

 

Athugasemdir

[Bjarni Gunnlaugur (IP-tala skráð) 15.12.2013 kl. 13:52]

Væri ekki bara eðlilegast að leggja niður lífeyrissjóðskerfið?

Það mætti gera með þeim hætti að öllum þeim sem hafa unnið sér inn réttindi með greiðslum í það, verði heimilt að taka inneign sína út með þá eðlilegum afföllum sem stafa af bólueignareðli kerfisins. Ef menn kjósa að láta þessa snillinga ávaxta sína krónu áfram þá geti menn líka gert það.

    Siðan verður almannatryggingakerfið látið greiða öllum lífeyrisþegum lífeyri með mjög hóflegum tekju- (eigna-?) tengingum. Als ekki krónu á móti krónu.    Það sem launþegar hafa greitt (skyldan)  í lífeyrissjóð greiði þeir í þess stað í skatta sem nýtast til að fjármagna almannatryggingakerfið.  

Einfalt, rökrétt og skynsamlegt í stað þeirrar tifandi tímasprengju sem lífeyriskerfið er í dag.

p.s.   Ríkisstarfsmenn fá sinn rétt greiddan út með sömu afföllum og yrðu að meðaltali í almenna kerfinu.