Seðlabankinn: Niðurfærslan getur haft verðbólguáhrif

Seðlabankinn telur,að skuldaniðurfærsla ríkisstjórnarinnar  geti leitt til verðbólgu.Bankinn bendir á ,að þessi aðgerð geti stuðlað að aukinni einkaneyslu,sem geti aukið verðbólgu og haft neikvæð áhrif á viðskiptajöfnuðinn. Seðlabankinn er andvígur almennri skuldaniðurfærslu og telur sértækar aðgerðir í skuldamálum heimilanna eðlilegri.

Verðbólgan er nú  í fyrsta sinn um langt skeið komin niður fyrir verðbólgumarkmið Seðlabankans. Ef álit bankans á áhrifum  skuldaniðurfærslunnar gengur eftir, gæti verðbólgan, fljótlega eftir að niðurfærsla skulda hefst, farið á ný upp fyrir verðbólgumarkmið Seðlabankans.

Skoðanir eru skiptar um áhrif skuldaniðurfærslunnar. En varað hefur verið við því að taka út  séreignasparnað og nota  til greiðslu  á húsnæðisskuldum.Hefur verið bent á, að við  verðbólguskot gæti séreignasparnaðurinn brunnið upp á stuttum tíma.Ég tel, að það hafi verið réttlætanlegt að taka út séreignasparnað (lífeyrissparnað) fljótlega eftir hrun vegna  neyðarástands í fjármálum, sem ríkti hjá mörgum fjölskyldum.En öðru máli gegni nú.Ástandið hefur lagast og ekki er nauðsynlegt að taka út sparnað,sem ætlaður er til efri áranna.

 

Björgvin Guðmundsson