Almannatryggingar standa tryggingum í grannlöndum okkar langt að baki

Grunnlífeyrir almannatrygginga er tæpar 40 þúsund krónur hér á landi.Í grannlöndum okkar,Noregi,Danmörku,Svíþjóð og Bretlandi er hann þrisvar sinnum hærri. Íslendingar voru í fararbroddi almannatrygginga fyrst eftir stríð.En síðan hefur Ísland stöðugt dregist aftur úr á þessu sviði  og í dag rekur Ísland lestina.

Skeytingarleysi stjórnmálamanna 

Hvað veldur? Ástæðan er skeytingarleysi stjórnmálamanna á sviði almannatrygginga.Framámenn í íslenskum stjórnmálum virðast teja,að lífeyrir megi ekki vera hár í samanburði við lágmarkslaun.En þetta er alger missklningur.Vissulega má lífeyrir aldraðra  vera hærri en lágmarkslaun.Það sýnir einfaldlega að þjóðfélagið vill gera vel við sína eldri borgara.Röksemd Bjarna Benediktssonar,fjármálaráðherra um að lífeyrir megi ekki vera hár þar eð þá sé enginn hvati til þess að fara út á vinnumarkaðinn á ekki við eldri borgara.Eftirlaun verða hins vegar að vera það há að þau dugi til sómasamlegrar framfærslu hjá þeim,sem einungis hafa tekjur almannatrygginga.En svo er ekki í dag.Þar vantar mikið upp á.Sú hungurlús,sem ríkisstjórnin skammtar lífeyrisþegum frá l.janúuar 2016 breytir þar engu um. Lífeyrir aldraðra og öryrkja á að sjálfsögðu að vera svipaður og hann er í grannlöndum okkar.

Afnema þarf skerðingu tryggingabóta vegna lífeyrissjóðs

Jafnhliða  stórhækkun grunnlífeyris aldraðra þarf að afnema skerðingu lífeyris hjá TR vegna greiðslna úr lífeyrissjóði.Bjarni fjármálaráðherra og formaður Sjálfstæðisflokksins  lofaði því fyrir síðustu alþingiskosningar  að afnema þessa skerðingu.Hann hefur ekki efnt þetta loforð.Það er alvarlegt mál. Stjórnmálamenn geta ekki gefið kjosendum slík loforð án þess að standa við þau.Ef Bjarni efnir ekki þetta loforð strax á hann að segja af sér.Svo einfalt er það.Tekjutengingarnar fara mjög illa með aldraða og öryrkja. Eldri borgari,sem hefur 100 þúsund krónur á mánuði úr lífeyrissjóði missir sem svarar tæpum helmingi þessarar upphæðar frá almannatryggingum.Hvaða réttlæti er i því? Hvers vegna var þessi eftirlaunamaður að greiða í lífeyrissjóð alla sína starfsævi,ef hann nýtur þess ekki þegar hann er hættur að vinna?Það verður að afnema þessa skerðingu og það verður að afnema hana strax.

Björgvin Guðmundsson

formaður kjaranefndar 

Félags eldri borgara í Rvk.

 

Fréttablaðið 31.desember 2015