Lífeyrir og lágmarkslaun

 

 

 

Þegar lífeyrisgreiðslur til aldraðra frá TR  eru skoðaðar í hlutfalli af lágmarkslaunum kemur í ljós, að þær hafa lækkað í tíð núverandi ríkisstjórnar  í samanburði við tímabil fyrri ríkisstjórnar.Árið 2014 námu lífeyrisgreiðslurnar 101,6% af lágmarkslaunum en árið 2009 námu þær 115% af lágmarkslaunum. Árið 2010 voru lífeyrisgreiðslurnar  110,3% af lágmarkslaunum og árið 2011 námu lífeyrisgreiðslurnar 110,5% af lágmarkslaunum.Árið 2012 námu lífeyrissgreiðslurnar 105% af .lágmarkslaunum.

Íhaldsmenn vilja halda lífeyri niðri; fyrir neðan lágmarkslaun!

 Þessar tölur eru ekki í samræmi við málflutning fulltrúa ríksstjórnarinnar um, að framlög til lífeyris aldraðra hafi stóraukist. Svo er ekki .Í stað þess  að aukast í hlutfalli við lágmarkslaun eins og eðlilegt hefði verið, hafa þær minnkað sem hlutfall lágmarkslauna.Þetta er vegna þess, að núverandi ríkisstjórn hefur ekki lagt neina áherslu á ,að hækka lífeyri aldraðra og öryrkja í takt við hækkun lágmarkslauna. Þvert á móti hafa talsmenn ríkisstjórnarinnar lýst því yfir á alþingi, að  lífeyrir aldraðra og öryrkja frá TR ætti ekki að vera eins hár og lágmarkslaun.Eða eins og Bjarni Benediktsson formaður Sjálfstæðisflokksins sagði þá yrði enginn hvati fyrir aldraða og öryrkja að fara út á vinnumarkaðinn, ef lifeyrir væri eins hár og lágmarkslaun eða hærri! Bjarni vill m.ö.o. reka aldraða, áttræða og þaðan af eldri út á vinnumarkaðinn og einnig vill hann reka öryrkja út á vinnumarkaðinn hvort sem þeir eru vinnufærir eða ekki. Þetta sjónarmið íhaldsmanna er mjög undarlegt.

Lífeyrir á að duga fyrir framfærslu

Auðvitað má lífeyrir aldraðra og öryrkja vera hærri en lágmarkslaun.Það eina,sem skiptir máli í því sambandi er það, að lífeyrir dugi fyrir framfærslu en svo er ekki í dag ,a.m.k. ekki hjá þeim verst stöddu.Síðan er það verkefni verkalýðshreyfingarinnar að berjast fyrir því, að lágmarkslaun verkafólks séu nægilega há. Til skamms tíma hafa þau verið skammarlega lág eins og lífeyrir aldraðra og öryrkja.Lágmarkslaunin hafa verið leiðrétt en lífeyrir hefur enn ekki verið leiðréttur að fullu.

Björgvin  Guðmundsson

www.gudmundsson.net