Er íslenska hagkerfið brothætt?

Breskir fjölmiðlar hafa fjallað mikið um íslensk efnahagsmál undanfarna daga. Blaðið Daily Telegraph segir í dag, að ástandið á Íslandi geti haft áhrif á Tyrkland, Eystrasaltsríkin, Balkanríkin, Ungverjaland og hugsanlega Suður-Afríku.

Segir blaðið, að allt séu þetta lönd, sem lifi langt um efni fram og hafi stoppað í fjármálagöt með ódýru lánsfjármagni. Erlend lán hafi vaxið langt umfram öruggan „hámarkshraða".

Blaðið segir, að brothætt hagkerfi Íslands ætti að vera öðrum löndum víti til varnaðar. Seðlabankinn hafi neyðst til að hækka vexti í 15% til að stöðva gengisfall krónunnar. Þá hafi eignasafn íslensku bankanna sett heimsmet: áttfalda landsframleiðslu Íslands.

Nú hafi verið skrúfað fyrir ódýra fjármagnið og skuldatryggingaálag bankanna sé komið yfir 800 stig, svipað og skuldatryggingaálag Bear Stearns var áður en bandaríski seðlabankinn kom þeim banka til aðstoðar. Þetta vekur upp þá spurningu, hvort íslenska ríkið, sem ráði yfir hagkerfi á stærð við Bristol, sé nægilega öflugt til að skjóta skildi fyrir bankana ef allt fer á versta veg.

„En Ísland er annað og meira en norrænn vogunarsjóður sem þykist vera land. Það er líka fyrsta skuldsetta ríkið sem verður fyrir barðinu á fjárfestaflótta og þannig kveikir það viðvörunarljós á stóru svæði í Austur-Evrópu og við Miðjarðarhaf," segir blaðið.

Haft er eftir sérfræðingi í málefnum Austur-Evrópu hjá Capital Economics, að hann myndi ekki vilja geyma fé í tyrkneskri líru og það sé í raun merkilegt hve líran hafi haldið sínu lengi. Tyrkneska hagkerfið sé afar viðkvæmt og viðskiptahallinn sé um 8% af vergri landsframleiðslu. Þá sé ríkissaksóknari landsins að reyna að koma ríkisstjórn landsins frá.

Blaðið segir, að viðskiptahalli Íslands sé nú 16% af landsframleiðslu, viðskiptahalli Lettlands er 25%, Búlgaríu 19%, Georgíu 18%, Eistlands 16%, Lettlands 14% og Serbíu 13%. 

Mér finnst þetta blað nokkuð neikvætt í garð Íslands. Íslensku bankarnir eru mjög sterkir,með 10% eiginfjárstöðu,miðað við 6% í Bandaríkjunum.Íslensku lífeyrissjóðirnir eru með þeim sterkustu í heimi. Og ríkissjóður Íslands er skuldlaus erlendis. Hins vegar er viðskiptahallinn alltof mikill.

 

Björgvin Guðmundsson

„

Íslandsbylgjan gæti skollið á mörgum löndum

Athugasemdir

[Guðjón Sigþór Jensson, 27.3.2008 kl. 15:07]

Þó svo að sitthvað virðist vera traust hjá okkur þá er fyllsta ástæða að við Íslendingar verðum að vera mjög varkárir í fjármálum. Á örfáum vikum hefur t.d. evran hækkað úr um 90 krónum í 120 sem er um þriðjungs hækkun (33%) sem er virkilega mikið á stuttum tíma í sögu þjóðar.

Eitt af því sem þarf að huga að er aukin hagkvæmni í rekstri þjóðarbúsins. Forðast þarf meiri kostnað en nauðsynlegt er. Mér finnst mjög athugunarvert þegar rekstur stórs kúabús sé hafinn í hátt í 500 km fjarlægð frá aðalmarkaðssvæðinu með tilheyrandi kostnaði. Nú bendir ýmislegt til að búið verði að grafa göng og leggja tvöfalda vegi út um allt land áður en hafist verður handa við Sundabraut sem er talin vera ein hagkvæmasta framkvæmd í samgöngumálum. Við erum með tvo flugvelli aðeins 50 km frá hvorum öðrum.

Er vit í þessu?

Mosi