Í Kína fyrir 28 árum

 

Kina er mikið í sviðsljósinu um þessar mundir vegna væntanlegra Olympíuleika,sem verða í Kína í sumar en einnig vegna átaka við Tíbet.

Árið 1980 fór ég til  Kína í boði borgarstjórnar Peking. Með í för voru Birgir Ísl. Gunnarsson og Sigurjón heitinn Pétursson.Við lögðum af stað daginn eftir spennandi forsetakosningar hér,þegar Vigdís Finnbogadóttir var kosinn forseti í fyrsta sinn.Við flugum fyrst til Parísar en tókum þar nýja flugvél,þotu af gerðinni  Boing 747, en Kínverjar höfðu þá eignast nokkrar slíkar og voru að opna nýja flugleið milli Parísar og Peking. Heimsóknin til Kína var mjög áhugaverð. Við  áttum þess kost að ferðast vítt um landið og fara m.a. upp á Kínamúrinn. Þetta var á þeim tíma,þegar landið var að byrja að opnast og fyrstu  erlendu fjárfestarnir voru komnir til landsins og bjuggu á hótelum.Á næstu árum á eftir varð gífurlegur uppgangur í Kína,fyrst og fremst vegna erlendra fjárfestinga og átti uppgangurinn eftir að aukast ár frá ári.Við heimsóttum fólk í litlum íbúðum ,þar sem margar kynslóðir bjuggu saman og við sáum tvær hliðar í Kína: Erfið lífskjör og þröngan húsakost og gífurlega uppbyggingu í þungaiðnaði,verksmiðjur og virkjanir.Einnig sáum við sýnishorn af landbúnaði.Þá fórum við í leikhús og sáum  kínverska leiklist.Á þessum tíma var ekki mikið um ferðir til Kína. En fyrir okkur var þetta mikið ævintýri. Frá Kína fórum við til Hong Kong og sáum þar algera andstæðu Kína: Vörugnótt og lágt vöruverð og algeran luxus.

Björgvin Guðmundsson