ASÍ gagnrýnir ólíkar þjóðhagsspár

Það er ekki trúverðugt þegar fjármálaráðuneytið og Seðlabankinn gefa út ólíkar þjóðhagsspár. Þetta segir Grétar Þorsteinsson, forseti ASÍ. Tveir virkir dagar liðu á milli spánna.

Fjármálaráðuneytið spáir 8,3% verðbólgu á árinu í endurskoðaðri þjóðhagsspá sem kynnt var í morgun. Í Peningamálum Seðlabankans sem voru birt á fimmtudag er gert ráð fyrir 11% verðbólgu á 12 mánaða tímabili, hún gæti þó orðið allt að 15%. Þá býst fjármálaráðuneytið við að verðbólgumarkmið náist á seinni hluta næsta árs, en Seðlabankinn gerir sér vonir um að það náist ári síðar.

Grétar segir áhyggjuefni hversu mikið skilji á milli í spánum. Seðlabankinn og fjármálaráðuneytið ættu að vera á svipuðum nótum. Það gangi ekki að það séu mismunandi spár frá þeim. Slíkt sé ótrúverðugt.

Fjármálaráðuneytið býst við að verð fasteigna lækki um 15% á næstu árum sé verðbólga tekin með í reikninginn. Þetta er ekki í neinu samræmi við spá Seðlabankans um 30% lækkun fasteignaverðs sem margir hafa reyndar gagnrýnt.

Það er vissulega rétt hjá ASÍ að  það dregur úr trúverðugleika spánna hve ólíkar þær eru.Báðir aðilar,fjármálaráðuneyti og Seðlabanki hljóta að hafa sömu gögn til að byggja á.Þess vegna ættu spárnar að vera  svipaðar. Fjármálaráðherra segir,að spár ráðuneytisins séu íhaldssamar en spár Seðlabankans ýktar.Erfitt er sð vita hverju á að treysta.

Björgvin Guðmundsson