Margir þingmenn á faraldsfæti

Tuttugu og sex varaþingmenn hafa tekið sæti á Alþingi það sem af er þessu þingi, þar af hafa sjö komið inn tvisvar. Varamaður situr alla jafna inni í tvær vikur og því hafa varaþingmenn setið á Alþingi í 66 vikur samtals. Þetta er meira en á síðustu tveimur árum.

Veturinn 2006 til 2007 tóku 23 varaþingmenn sæti á Alþingi þar af fimm tvisvar og árið þar á undan líka 23, þar af þrír tvisvar. Þannig hafa mun fleiri varaþingmenn verið kallaðir til nú en þá og flestir frá Vinstri grænum. Sjö varaþingmenn sitja nú á Alþingi.

Það eru ýmsar ástæður fyrir því að varaþingmenn eru kallaðir inn, oftast er það vegna þess að þingmaður getur ekki sótt þingfundi vegna opinberra erinda. Sama má segja um ráðherra. Margir þingmenn eru nú á faraldsfæti eða allavega þrettán.

Þingmenn sitja í nefndum og ráðum erlendis og því er eðlilegt,að þeir þurfi að ferðast til útlanda.En það er hins vegar óeðlilegt að þeir teygi úr ferðum sínum til þess að varamenn geti komið inn. Þingmaður þarf að vera fjarverandi í 2 vikur til þess að kalla megi inn varamann.Þetta kerfi á ekki að misnota.Og það sama gildir að sjálfsögðu um ráðherra. Þeir eiga ekki að lengja ferðir sínar að óþörfu til þess að varamenn komist inn.

Björgvin Guðmundsson