Þjóðin ákveði hvort farið verði í viðræður um aðild

Össur Skarphéðinsson, iðnaðarráðherra, lýsir sig sammála Þorgerði  Katrínu Gunnarsdóttur, menntamálaráðherra, um að breyta eigi stjórnarskránni til að greiða fyrir hugsanlegum aðildarviðræðum við Evrópusambandið.

Össur leggur til  að það verði “þjóðin sjálf, en hvorki alþingi né ríkisstjórn” sem ákveði hvort sótt verði um aðild og telur að með því að fylgja eftir hugmynd Björns Bjarnasonar, dómsmálaráðherra, um vegvísi mætti efna til slíkrar atkvæðagreiðslu eftir 6-9 mánaða undirbúningstíma. “Er ekki gott fyrir alla að þetta mál yrði frá við næstu þingkosningar?” spyr Össur í nýrri bloggfærslu.

Hann segir: “Lengi vel taldi ég sjálfur að óþarft væri að leggja nema í eina atkvæðagreiðslu – um sjálfa niðurstöðuna. En, gott og vel, einsog málum er komið þá get ég vel fallist á, að því aðeins verði sótt um aðild, að meirihluti taki í þjóðaratkvæðagreiðslu afstöðu með umsókn – áður en hún er lögð fram.

Það þarf í sjálfu sér engar vangaveltur og litla vinnu til viðbótar um kosti og galla umsóknar. Öll gögn málsins liggja meira og minna fyrir, meðal annars af hendi þeirrar ágætu Evrópunefndar sem við Björn sátum báðir í.”

Hugmynd Össurar er athyglisverð. Hann vill,að þjóðin ákveði hvort farið verði í aðildarviðræður. Yfiræleitt hefur verið miðað við að aðildarsamningur,niðurstaða samningaviðræðna væri borin undir þjóðaratkvæði en ekki  spurningin um það hvort hefja ætti viðræður.

 

Björgvin Guðmundsson

Athugasemdir

[Hallur Magnússon, 22.4.2008 kl. 09:56]

Framsóknarmaðurinn Magnús Stefánsson alþingismaður benti á þessa leið fyrir stuttu síðan og Samband ungra framsóknarmanna hafa ályktað á þessa leið - svo mér sýnist þetta steinliggja!

Að sjálfsögðu er þetta leiðin!

Mín skoðun er sú að það ætti að kjósa um þetta samhliða sveitarstjórnarkosningum. Ef niðurstaðan er jákvæð þá höfum við eitt þing til að ganga frá breytingum á stjórnaskrá fyrir kosningar - og undirbúa viðræður. Ný ríkisstjórn myndi þá hefja viðræður og leggja niðurstöður þeirrra undir sérstaka þjóðaratkvæðagreiðslu þegar þar að kæmi!

Meira um þetta í pistli mínum. Guðni stingur höfðinu í sandinn gagnvart afstöðu Framsóknarfólks!