Bankarnir skulduðu 5997,6 milljarða erlendis um síðustu áramót

Hinn 15.mars sl. skrifaði  ég eftirfarandi:

 

Samkvæmt hagtölum Seðlabankans nema heildarskuldir þjóðarinnar erlendis 7138,3 milljörðum króna,miðað við síðustu áramót. Árið áður námu þær 5207,2 milljörðum.Hið opinbera skuldar aðeins 243,5 milljónir.En bankar og aðrar innlánsstofnanir skulda 5997,6 milljarða,miðað við 4262,8 milljarða árið áður.  Samkvæmt þessum tölum er ljóst,að bankarnir hafa farið mjög óvarlega á síðasta ári með því að  auka svo mjög erlendar skuldir sínar. Heita má,að nú hafi verið skrúfað fyrir bankana erlendis varðandi auknar lántökur. Þeir geta fengið lán en á mikið verri kjörum en áður.

Seðlabankinn á  að hafa eftirlit með bönkunum og hann hefði getað sett bönkunum skorður varðandi  lántökur erlendis.En hann kaus að loka augunum og gera ekki neitt.

Þessar erlendu skuldir hafa stórhækkað vegna gengislækkunar krónunnar.

 

Björgvin Guðmundsson

 

Athugasemdir

[Guðjón Sigþór Jensson, 23.4.2008 kl. 12:03]

Þetta eru skelfilega háar tölur. Sjálfsagt koma eignir á móti skuldum, einkum útlán með veði í íbúðahúsnæði, fasteignum eða öðrum tryggingum. Hætt er við að margar íbúðir séu núna yfirveðsettar enda hafa Íslendingar spennt bogann um of, því miður. Það hefði verið æskilegt að þeir sem skulda núna hefðu áður tekið sér í hönd og lesið Sjálfstætt fólk eftir Halldór um hrakfallabálkinn Bjart í Sumarhúsum. Eins og margir sem núna standa frammi fyrir erfiðleikunum þá varð Bjarti heldur en ekki á í messunni að taka lán í góðærinu til að setja fleiri lömb á vetur með þeirri von að hagurinn vænkaðist enn meir. Því miður varð verðfall bæði á afurðum og veðin féllu verulega í verði.

Fyrir nokkrum misserum var hagnaður bankanna vel á annað hundruð milljarða. Það þótti mörgum há tala sem væntanlega var bókhaldsfærður hagnaður, meiri sýndarhagnaður en raunverulegur hagnaður. Svo náði einn fyrrum bankastjóri að stinga af með 9 milljarða í starfslokasamning og hann virðist alls ekki vera að leggja árar í bát.

Svona er lífið en einhvern tíma tekur landið að rísa aftur - að nýju.

Mosi