Allt í vitleysu í borgarstjórn

Fátt veldur stuðningsmönnum Sjálfstæðisflokksins meiri áhyggjum um þessar mundir en ástandið í borgarstjórnarflokki Sjálfstæðisflokksins í Reykjavík. Þar hefur skapazt ástand, sem engin fordæmi eru fyrir í sögu þessa stærsta og öflugasta stjórnmálaflokks þjóðarinnar. Þetta kemur meðal annars fram í Reykjavíkurbréfi Morgunblaðsins í gæe.

Í fyrsta lagi er sú tilfinning sterk meðal stuðningsmanna Sjálfstæðisflokksins, að innan borgarstjórnarflokksins skorti á að full samstaða sé á milli borgarfulltrúa.

Í öðru lagi að borgarstjórnarflokkinn skorti forystu þrátt fyrir yfirlýsingu borgarfulltrúa annarra en Vilhjálms Þ. Vilhjálmssonar og varaborgarfulltrúa frá því í lok febrúar, sem var svohljóðandi:

„Borgarstjórnarflokkurinn tekur undir það með Vilhjálmi, að ekki sé ástæða til að ákveða nú hver verður borgarstjóri eftir rúmt ár. Sú ákvörðun verður tekin af borgarstjórnarflokknum í sameiningu þegar nær dregur og með hagsmuni flokksins og borgarbúa að leiðarljósi.“

Í þriðja lagi ríkir óvissa innan borgarstjórnarflokksins um fyrirætlanir Vilhjálms Þ. Vilhjálmssonar, þrátt fyrir yfirlýsingu hans frá því í lok febrúar þar sem hann sagði m.a.:

„Hvað mig varðar er opið hver tekur við embætti borgarstjóra af hálfu Sjálfstæðisflokksins í marz 2009. Borgarstjórnarflokkurinn mun ákveða borgarstjóraefnið í sameiningu þegar nær dregur.“

Og í fjórða lagi skilur almenningur í borginni ekki hvað vakir fyrir borgarstjórnarflokki Sjálfstæðisflokksins í svonefndu REI-máli.

Ekki er óeðlilegt að stuðningsmenn Sjálfstæðisflokksins hafi spurt hvað forystumenn Sjálfstæðisflokksins ætli að gera til þess að ráða bót á því, sem þeir upplifa sem upplausnarástand innan borgarstjórnarflokks sjálfstæðismanna.

Sennilega er árangursríkasta leiðin út úr þeirri sjálfheldu, sem borgarstjórnarflokkur Sjálfstæðisflokksins í Reykjavík er komin í að borgarfulltrúar og varaborgarfulltrúar leiti til grasrótarinnar í flokknum. Haldi fundi í hverfafélögunum og í fulltrúaráðinu og leggi spilin á borðið. Geri grein fyrir stöðu mála bæði að því er varðar persónur og málefni og hlusti á viðbrögð grasrótarinnar. Taki svo ákvarðanir í framhaldi af slíku samráði við fólkið í flokknum. Enda má gera ráð fyrir að heilbrigð skynsemi móti mjög þær raddir, sem borgarfulltrúarnir mundu heyra á slíkum fundum.

Mikil óánægja er meðal borgarfulltrúa Sjáæfstæðisflokksins  með Reykjavíkurbréf Mbl. Þar er Vilhjálmur sleginn af. En hann mun ekki hafa ákveðið að hætta við framboð til borgarstjóra.

 

Björgvin Guðmundsson

 

Ástandið veldur sjálfstæðismönnum áhyggjum