Hefur verkalýðshreyfingin brugðist?

Rætt var um verkalýðshreyfinguna í þætti Hjálmars Sveinssonar Á krossgötum í RUV í gær. Viðmælendur voru 4 fulltrúar grasrótarinnar,sem hafa verið ræðumenn á útifundum á Austurvelli.Fulltrúar grasrótarinnar gagnrýndu verkalýðshreyfinguna harðlega   og sögðu allan kraft úr henni.Hefði verkalýðshreyfingin um langt skeið verið aðgerðarlítil eða allt síðan þjóðarsáttin var gerð. ASÍ kappkostaði að hafa sem best samstarf við Samtök atvinnulífsins  en baráttuviljann skorti.Nú væri mikið atvinnuleysi,mikil verðbólga og kaupmáttur hrapaði stöðugt svo verkalýðshreyfingin gæti ekki setið með hendur í skauti.

Fulltrúar grasrótarinnar,sem komu fram í þætti Hjálmars Sveinssonar virðast hafa mikið til síns mál. Kjarasamningar eru í uppnámi en samkvæmt þeim eiga launþegar að fá verulega vísitöluhækkun en hljóðið varðandi hana er neikvætt hjá fulltrúum iðnaðarins. Samkvæmt útreikningum Hagstofunnar hefur kaupmáttur launa þegar lækkað um 7,7%. Launþegar verða því að fá vísitöluhækkun til þess að vega upp á móti.ASÍ verður að tryggja þá hækkun og ráðstafanir til aukningar á atvinnu.

 

Björgvin Guðmundsson