Auka þarf jöfnuð í þjóðfélaginu

Meðan ríkisstjórn Sjálfstæðisflokksins og Framsóknarflokksins sat við völd gagnrýndi ég það iðilega í greinum,að skattastefnan væri slík,að hún yki ójöfnuð í þjóðfélaginu. Hátekjuskattur var afnuminn og skattar auknir á þeim sem höfðu lágar og meðaltekjur en skattar voru lækkaðir á háum tekjum! Þessu mótmælti fyrrverandi fjármálaráðherra,Árni Mathiesen. En í skýrslu,sem gerð var fyrir fjármálaráðuneytið og birt í lok nóvember sl.  kom fram,að gagnrýnin á skattastefnu stjórnvalda var réttmæt.Í skýrslunni   sagði svo m.a:" Hérlendis hefur dregið úr jöfnunarhlutverki skattkerfisins á liðnum árum eftir að hátekjuskattur var afnuminn og raunlækkun varð á persónuafslætti umfram lækkun álagningarhlutfalls " Þannig má segja,að fjármálaráðuneytið sjálft hafi leiðrétt málflutning ráðherrans.

Sá maður,sem gagnrýni mest ójafnaðarstefnu stjórnvalda í skattamálum var Ólafur Ólafsson  fyrrv. landlæknir en hann gagnrýndi þessa stefnu  harðlega sem formaður FEB í Reykjavík.Þeir Þorvaldur Gylfason prófessor og Stefán Ólafsson prófessor gagnrýndu einnig þessa stefnu harðlega.

Samfylkingin lofaði því fyrir kosningarnar 2007 að auka jöfnuð í þjóðfélaginu. Flokkurinn kom því fram í ríkisstjórn,að skattleysismörkin væru hækkuð.Það hjálpar nokkuð en of lítið skref var stigið.Það þarf að laga skattkerfið mikið meira.

 

Björgvin Guðmundsson